ЕИ яна Украина учун ўқ-дорилар сотиб олиш бўйича бир қарорга келолмади

Европа Иттифоқи давлатларининг элчилари Украина учун биргаликда ўқ-дорилар сотиб олиш бўйича яна келиша олмадилар ва 28 апрел куни муросага эришиладими ёки йўқми, ҳозирча аниқ эмас, деб хабар беради Полшанинг RMF FM радиостанцияси.

Фото: Alex Brandon/dpa/AP/picture alliance

Унинг эслатишича, Брюссел Киевга йил охиригача ЕИ мамлакатлари омборларидан ҳам, қўшма харидлар доирасида ҳам 1 миллион ўқ-дори топширишга ваъда берган. Бироқ, шу кунгача ЕИ давлатлари 40 мингдан кам ўқ-дориларни жўнатган.

Европа дипломатияси раҳбари Жозеп Боррел аввалроқ иштирокчи 27 давлат мудофаа вазирларини ушбу муаммога эътибор қаратишга чақирган эди.

Чақириқнинг моҳияти шундан иборатки, улар ўз захираларини кўриб чиқишлари керак, чунки уларда ҳеч нарса қолмаганига ишониш қийин, деди Ғарб дипломатларидан бири RMF FM'га.

Унинг сўзларига кўра, қўшма харидларни Франция тўсиб қўйган, у ўқ-дориларни ишлаб чиқариш ва етказиб беришнинг барча занжирлари Европада бўлиши кераклигини таъкидламоқда.

Агар ишлаб чиқариш Европа Иттифоқи давлатларидан бирида жойлашган бўлса ва порох Жанубий Кореяда ишлаб чиқарилган бўлса ҳам, Париж рози бўлмайди, дея таъкидлади манба.

“Европа қурол-яроғ саноатини бу тарзда белгилаб бўлмайди, акс ҳолда биз Украинани ҳеч қачон ўқ-дорилар билан таъминламаймиз”, — дея огоҳлантирди дипломат.