АҚШ декабрь ойидан бери Украинадаги урушда 20 минг россиялик ҳалок бўлганини эълон қилди

Умумий йўқотишлар сони 100 минг кишини ташкил қилган.

Фото: AP

Оқ уйнинг маълум қилишича, Россия декабрь ойидан бери Украинадаги урушда 100 минг кишини йўқотган, шу жумладан, 20 мингдан ортиқ киши ҳалок бўлган, чунки Украина ҳарбийлари шарқда Россиянинг кучли ҳужумини қайтарган.

АҚШ Миллий хавфсизлик кенгаши вакили Жон Кирби сўзларига кўра, бу маълумотлар АҚШ разведкасига асосланган. У разведка идоралари рақамларни қандай аниқлагани ҳақида батафсил маълумот бермади.

Ноябрь ойида АҚШ штаблари бошлиқлари қўмитаси раиси генерал Марк Милли Россия урушнинг дастлабки саккиз ойида 100 мингдан ортиқ кишини йўқотгани ҳақида хабар берган эди. Янги маълумотларга кўра, сўнгги ойларда Россиянинг йўқотишлари кескин ошган.

Кирбининг айтишича, декабрь ойидан бери ҳалок бўлганларнинг деярли ярми «Вагнер» ХҲК жангчилари бўлиб, уларнинг кўпчилиги урушда иштирок этиш учун қамоқдан озод қилинган маҳкумлардир. Унинг сўзларига кўра, «Вагнер» қўшинлари «етарли даражада жанговар тайёргарликсиз жангга ташланган».

Кирби жангларда қанча украиналик аскар ўлдирилгани ёки яралангани ҳақида маълумот бермади. Генерал Милли ноябрь ойида украиналик қурбонлар ҳам 100 минг атрофида бўлишини айтган эди.

Россия томони ўз армиясининг йўқотишлари ҳақида батафсил маълумот бермаган.