Миср ҳукумати гепатитга қарши дорининг дастлабки партиясини Ўзбекистонга юборди

Жорий йилнинг 29 апрель куни Миср ҳукумати томонидан мамлакат шифохоналарида фойдаланиш учун инсонпарварлик ёрдами сифатида ажратилган, дунёда кенг тарқалган касалликлардан бири – С гепатитига қарши дори воситасининг дастлабки партияси Тошкент халқаро аэропортида кутиб олинди, деб хабар бермоқда «Дунё».

Фото: Dunyo

Мамлакатнинг Қоҳирадаги элчихонаси томонидан ишлаб чиқилган мазкур юкнинг олиб келиниши Ўзбекистон ва Миср ўртасида соғлиқни сақлаш соҳасида ҳамкорликни янада жадаллаштириш, вирусологияда ўзаро қўллаб-қувватлашни ташкил этиш доирасида аввал эришилган келишувларнинг амалий натижасидир.

Умумий қиймати 35 минг АҚШ долларини ташкил этган 17 минг қутидан ортиқ дори воситаси Ўзбекистон Соғлиқни сақлаш вазирлиги ҳузуридаги Вирусология илмий-текшириш институти томонидан шифоталаб беморлар учун ишлатилади.

Ўзбекистон ва Миср соғлиқни сақлаш идоралари 2023-2024 йиллар давомида умумий қиймати 4,8 миллион долларлик жами 800 минг дона (40 тоннага яқин) С гепатитига қарши дори воситаларини бепул етказиб бериш бўйича келишувга эришган.