Европа кенгаши "демократиядан қайтишга" қарши туришга чақирди

Европа кенгаши (ЕК) бош котиби Мария Пейчинович-Бурич Европа маконида “демократиядан қайтиш”га қарши туришга чақирди. Пейчинович-Буричнинг йиллик ҳисоботи 5 май, жума куни Страсбургда чоп этилди.

Эксперт Россиянинг “Украинага қарши шафқатсиз, ноқонуний ва давом этаётган тажовуз”ига ишора қилиб, бу азоб-уқубатларга, жумладан, юз минглаб ўлим, миллионлаб қочқинлар, қийноқлар ва зўрлашларга олиб келганини айтди. "Биз тинчликка қайтишни хоҳлаймиз: адолатга асосланган барқарор тинчликка", дея қўшимча қилди у.

Ҳисоботда “янги қонунлар ва амалдагиларнинг фуқаролик жамиятини чеклаш учун суиистеъмол қилиниши” ҳақида сўз боради. Шу билан бирга, оммавий намойишлар хато туфайли хавфли деб таснифланади, намойишчиларга нисбатан ҳаддан ташқари куч ишлатиляпти, нодавлат ташкилотлар молиявий чекловлар ва бюрократик тўсиқларга дуч келяпти, ҳуқуқий тизим эса мухолифатни йўқ қилиш учун қўлланиляпти. Ҳисоботда айтилишича, сиёсий муҳит қутбланмоқда ва нафрат тўла баёнотлар ҳам интернетда, ҳам ундан ташқарида тарқалишда давом этмоқда, улар кўпинча аёллар ва заиф гуруҳларга қарши қаратилган.

Ҳужжатда журналистларга нисбатан зўравонлик ҳолатлари кўпайиши, уларни қўрқитиш учун кузатувдан фойдаланиш, шунингдек, ҳибсга олиш ва стратегик даъволарга эътибор қаратилади.

Бироқ, Европа Иттифоқига аъзо баъзи давлатларда "ижобий ўзгаришлар ҳам бор", деб таъкидланади ҳисоботда. Унинг маълумотлари асосан Европа кенгаши манбаларидан, Инсон ҳуқуқлари бўйича Европа суди қарорларидан, Парламент ассамблеяси, Инсон ҳуқуқлари бўйича комиссар ҳисоботларидан ва “Қонун орқали демократия учун Европа комиссияси” хулосаларидан олинган.

Европа кенгашининг 46 аъзоси давлат ва ҳукумат раҳбарлари 16 ва 17 май кунлари тўртинчи саммитини ўтказади. Кенгашнинг мақсади - Инсон ҳуқуқлари бўйича Европа суди билан бирга - Европада демократия ва қонун устуворлигини қўллаб-қувватлашдир. Вазирлар қўмитасининг 2022 йил 16 мартдаги қарорига мувофиқ, Россия энди Европа кенгашининг аъзоси эмас.