Украина бўйлаб навбатдаги зарбалар ва Бахмут атрофидаги ярадорлар. Уруш суратлари

Украинадаги урушнинг 445-куни ўтди. Асосий маълумотлар:

Володимир Зеленский 14 май куни Германия ва Францияга ташриф буюрди. 15 май куни украинлар етакчиси Лондонга борди ва Буюк Британия бош вазири Риши Сунак билан учрашди.
The Washinghton Post махфийлаштирилган ҳужжатларга таяниб, Украина президенти «Дружба» нефт ташиш қувурини портлатиш ва РФ ҳудудидаги аҳоли яшаш манзилларини эгаллаб олиш имкониятини муҳокама қилгани ҳақида ёзди. Зеленский буни «шунчаки фантастика» деб атади.
«Катта еттилик» ва Евроиттифоқ Россия гази қувурлар орқали Полша ва Германияга олиб келишига тақиқ қўйишни режалаштирмоқда. Россия бу йўналишларда ташувни 2022 йилда тўхтатиб қўйган, аммо бу ҳали расман тақиқланмаган.
РФ мудофаа вазирлиги Донецк областининг Бахмут шаҳри атрофидаги жангларда икки полковниги ҳалок бўлгани ҳақида эълон қилди.
Украина ҚК ҳаво кучлари расмийси Юрий Игнат Брянск областида РФ мудофаа вазирлиги вертолётлари ва самолётлари ҳалокатга учраши «Россия ҳаво ҳужумидан мудофаа тизимлари иши» эканини айтди. Кейин аниқлик киритиб, бу ҳазил бўлганини айтди. «Вагнер» ХҲК асосчиси Евгений Пригожин ҳам ҳалокатга Россия ҳаво ҳужумидан мудофаа кучлари алоқадорлигига ишора қилди.
Володимир Зеленский Германияда Буюк Карл мукофотини топшириш маросими вақтида Беларус мухолифати етакчиси Светлана Тихановская билан учрашди ва улар қўл сиқиб кўришишди.
Норвегиянинг The Barents Observer нашри ёзишича, Россия Швеция ва Финландия чегарасидаги Кола яриморолига стратегик бомбардимончиларини жойлаштирган.

Украина шаҳарлари ўққа тутилиши

Украина ҚК бош штаби маълумотига кўра, 14 май куни Россия қўшини Украина аҳоли яшаш манзиллари бўйлаб 11 та ракета зарбалари, шунингдек, 41 та авиация зарбаси йўллаган. Ракета зарбалари Харкив, Тернопил ва Константиновка бўйлаб йўлланган. Россия ҳарбийлари Украина ҚК позициялари ва аҳоли яшаш пунктларига баравар ўт очиш реактив тизимларидан 74 бор ўт очган. Отишмалар оқибатида тинч аҳоли вакиллари жабрланган, хусусий уйлар ва бошқа фуқаролик инфрутазилмалари вайрон бўлган ёки шикастланган.