ISW: Украина қўшинлари Бахмутда ташаббусни қўлга олди

Урушни ўрганиш бўйича Америка институти (ISW) ҳисоботига кўра, 18 май куни Украина қўшинлари қарши ҳужум операциялари давомида Бахмут ҳудудида тактик ташаббусни қўлга олди ва тактик жиҳатдан муҳим муваффақиятларга эришди.

Фото: Getty Images

Бу амалиётлар, таъкидланганидек, Украина кучлари бир неча кундан бери олиб бораётган маҳаллий қарши ҳужумларнинг давоми бўлиб, янги йирик операция бошланишини акс эттирмайди.

ISW таҳлилчилари, шунингдек, «Вагнер» ХҲК асосчиси Евгений Пригожиннинг Россия қўшинлари Бахмут шимолидаги 570 метрлик ҳудудни топшириб юборгани ҳақидаги баёнотини ҳам келтириб ўтди.

Бу Украина мудофаа вазири ўринбосари Анна Малярнинг Украина қўшинлари Бахмутдан шимолга 500 метр ва Бахмутдан жанубга 1000 метр илгарилагани ҳақидаги баёнотига мос келади, дейилади хабарда.

«Вагнер» ХҲКнинг Бахмутдаги ҳужум ҳаракатлари характери Украинанинг маҳаллий қарши ҳужумлари билан солиштирганда нисбатан чекланган, бу Россиянинг ҳудуддаги ташаббусини йўқотганини кўрсатади», деб ёзади ISW экспертлари.