Ўзбекистон ва Тожикистон фавқулодда ҳолатларда бир-бирининг аэродромларидан фойдаланиши мумкин бўлади

Президент “Ўзбекистон ҳукумати билан Тожикистон ҳукумати ўртасида форс-мажор ҳолатларда давлат авиацияси ҳаво кемалари томонидан ҳаво ҳудуди ва аэродромлардан фойдаланиш соҳасида ўзаро ҳамкорлик тўғрисидаги битимни ратификация қилиш ҳақида”ги қонунни имзолади.

Фото: Kun.uz

Ҳужжат Қонунчилик палатаси томонидан 2023 йил 14 февралда қабул қилинган, Сенат томонидан 2023 йил 4 майда маъқулланган.

Қонун билан Ўзбекистон ҳукумати ва Тожикистон ҳукумати ўртасида форс-мажор ҳолатларда давлат авиацияси ҳаво кемалари томонидан ҳаво ҳудуди ва аэродромлардан фойдаланиш соҳасида ўзаро ҳамкорлик тўғрисидаги битим (Душанбе, 2021 йил 10 июнь) ратификация қилинди.

Битимнинг асосий мақсади форс-мажор ҳолатларида давлат авиацияси ҳаво кемаларининг ҳаво ҳудуди ва аэродромлардан фойдаланиш соҳасида ўзаро ҳамкорлик қилишнинг ягона тартибини белгилашдан иборат.

Форс-мажор ҳолатлари юзага келган тақдирда томонлар давлат ҳаво ҳудудини қисқа муддатли кесиб ўтишга, ўз аэродромларидан бирига захира сифатида қўниш учун рухсат беришга ҳақлилиги назарда тутилган.