Малайзия йил охиригача Куала-Лумпур ва Тошкент ўртасида тўғридан тўғри қатновларни йўлга қўяди

Малайзиянинг йирик кундалик нашрларидан бўлган The New Straits Times газетасида “Йил охиригача Batik Air Куала-Лумпур ва Тошкент шаҳарлари ўртасида тўғридан тўғри авиақатновларни йўлга қўяди” сарлавҳали мақола эълон қилинди, деб хабар бермоқда “Дунё”.

Фото: Straits Times

Мақолада Batik Air (собиқ Malindo Air) лоукостер авиакомпаниясининг стратегик ривожланиш бўйича директори Чандран Рама Мути ушбу авиаташувчи Малайзия ва Ўзбекистон ўртасида ҳафтасига уч марта авиақатновлар амалга ошириш режалаштирилаётгани, биринчи рейс шу йилнинг ноябрь ёки декабрь ойларида бошланишини маълум қилган.

Чандран Рама Мутининг The New Straits Times газетаси мухбири билан суҳбатда билдиришича, Batik Air айни пайтда Ислом Каримов номидаги Тошкент халқаро аэропорти расмийлари билан музокаралар олиб бормоқда ва парвозларни бошлаш учун рухсат берилишини кутмоқда.

“Тошкент Қозоғистоннинг Олмаота шаҳри билан солиштирганда каттароқ бозор. Биз ҳали Тошкент халқаро аэропорти билан музокаралар олиб боряпмиз. Тошкент халқаро аэропорти Ўзбекистондаги энг йирик халқаро аэропорт бўлиб, 2019 йилда йўловчи ташиш ҳажми бўйича Марказий Осиё аэропортлари ичида учинчи ўринни эгаллаган”, дейди Чандран Рама Мути.

Batik Air “Куала-Лумпур-Тошкент” йўналишида “Боинг” компаниясининг тор фюзеляжли B737 МАХ8 ёки Airbus'нинг кенг фюзеляжли A330 самолётларидан фойдаланиши мумкин, чунки улар 8,5 соатгача парвоз қила олади.