АҚШ Украинага ислоҳотлар ва тикланиш учун маблағ ажратди

АҚШ Давлат департаменти ёрдам Киевга камчиликларни аниқлаш ва ислоҳотларга устувор аҳамият беришда кўмак кўрсатишини маълум қилди. Бу мақсадлар учун Вашингтон 437 минг доллар ажратади.

Фото: Getty Images

АҚШ Иқтисодий ҳамкорлик ва тараққиёт ташкилотининг Украинадаги ислоҳотларни қўллаб-қувватлаш, тиклаш ва реконструкция қилишга қаратилган дастурини амалга ошириш учун Киевга 437 минг доллар ажратди, деб хабар қилди 9 июнь, жума куни АҚШ Давлат департаменти матбуот хизмати.

«АҚШ ёрдами бўшлиқларни аниқлаш ва мамлакатни қайта тиклаш бўйича кенгроқ саъй-ҳаракатларни қўллаб-қувватлаш учун зарур бўлган ислоҳотларга устувор аҳамият қаратишда Украина иқтисодий позициясини молиялаштиради», — дейилади Давлат департаменти матбуот баёнотида.

АҚШ ташқи сиёсат идораси Вашингтон Украинага биринчи тиббий ёрдам кўрсатувчилар ва ҳукумат амалдорларига маош тўлаш, пенсиялар ажратиш ва касалхоналарни сақлаш учун аллақачон 19,25 миллиард доллар ажратганини эслатди.

НАТО бош котиби Йенс Столтенберг февраль ойида 2022 йилда ғарб давлатлари Украинага 120 миллиард долларлик ҳарбий, молиявий ва ҳуманитар ёрдам кўрсатганини маълум қилган эди.