Металлургия корхоналари лак-бўёқ ва мойлаш материаллари учун бож тўловидан озод қилинади

Президентнинг “Металлургия саноати салоҳиятини қўшимча кенгайтириш чора-тадбирлари тўғрисида”ги фармони лойиҳаси эълон қилинди.

Фармон лойиҳасида қонунчилик ҳужжатларига қуйидаги ўзгартириш ва қўшимчалар киритиш белгиланган:

Ўзбекистонда ишлаб чиқарилмайдиган, белгиланган тартибда шакллантириладиган рўйхатлар бўйича ишлаб чиқариш мақсадларида олиб кириладиган лак-бўёқ ва мойлаш материаллари учун металл маҳсулотлари ишлаб чиқарувчи корхоналарни божхона тўловларидан озод қилиш;

ясси металл прокати ишлаб чиқарувчи корхоналар экспорт фаолиятини давлат томонидан қўллаб-қувватлаш чораларидан фойдаланиш бўйича чекловларни олиб ташлаш мақсадида, 7210 49 000 0 ТИФ ТН коди ва 7210 70 800 0 ТИФ ТН коди товар позицияларини президент фармони билан тасдиқланган рўйхатдан чиқариш;

ёйма металл прокатини биржа савдолари орқали мажбурий сотилиши шарт бўлган товарлар рўйхатидан чиқариш.