Toyota Highlander Plus кроссовери тақдим этилди. Унинг нархи 39,7 минг доллардан бошланади

Toyota компанияси Хитойда ўзининг катта ҳажмли кроссовери Highlander’нинг янги модификацияси — Plus’ни тақдим қилди. 

Highlander Plus базавий комплектацияси 360 градусда атроф-муҳитни кўриш тизими (камера) билан жиҳозланган, тери билан қопланган ўриндиқларнинг қулайлик даражаси оширилган, орқа эшиклар эса электрон бошқарувга эга.

Plus 3 та версияда тақдим этилади ва уларнинг барчаси гибрид. Дастлабки 2 та версия 8 дюймлик дисплей билан, сўнгги топ комплектация эса 12,3 дюймлик экран билан жиҳозланган.

Автомобилга 2,5 литр ҳажмли 192 от кучига эга двигател ўрнатилган, у ўз навбатида Toyota'нинг махсус вариатор узатмалари қутиси – eCVT билан ҳамкорликда ишлайди. Шунингдек, топ версияда 54 от кучига эга электромотор ҳам мавжуд. 

Ҳажм жиҳатдан Highlander Plus “акаси” Highlander’ни тўлиқ такрорлайди — узунлиги 4965 мм, эни 1930 мм, бўйи эса 1750 мм. Ғилдираклар базаси бўлса, 2850 ммни ташкил қилади. 

Базавий комплектация учун 39,7 минг доллар, топ версия учун эса 42 минг доллар нарх белгиланган. Бироқ автомобилнинг илк харидорлари 2,8 минг долларлик чегирмага эга бўлишлари мумкин.