Сенат Ўзбекистон-Қозоғистон чегараси тўғрисидаги шартнома ратификация қилинишини маъқуллади

Ўзбекистон Сенатида маълум қилинишича, Ўзбекистон-Қозоғистон давлат чегарасини белгилаш бўйича ишлар тўлиқ якунланган.

Очиқ манбалардан олинган сурат

Сенат қирқ иккинчи ялпи мажлисида “Ўзбекистон билан Қозоғистон ўртасида Ўзбекистон – Қозоғистон давлат чегарасини демаркация қилиш тўғрисидаги шартномани ратификация қилиш ҳақида”ги қонун кўриб чиқилди.

Ҳужжат Ўзбекистон президенти Шавкат Мирзиёев ва Қозоғистон президенти Қосим-Жўмарт Тўқаев томонидан унинг 2022 йил 21 декабрь куни мамлакатга давлат ташрифи чоғида имзоланган эди.

Шартномага кўра, Ўзбекистон ва Қозоғистон ўртасидаги давлат чегарасининг демаркация қилинган чизиғи узунлиги 2 356 километрдан ортиқдир.

Шартнома билан Ўзбекистон-Қозоғистон давлат чегарасини белгилаш бўйича ишлар тўлиқ якунланди ҳамда чегара хавфсизлиги ва дахлсизлигини таъминлаш учун энг муҳим шарт-шароитлар яратилди.

Қонун сенаторлар томонидан маъқулланди.