Мушук боқадиган робот, Range Rover Evoque 2023 ва Volvo EX30 – ҳафта технодайжести

Range Rover Evoque 2023

Land Rover компанияси Range Rover Evoque кроссоверининг 2023 йилги версиясини тақдим этди. 

Кроссовер дизайни янгиланган, техник имкониятлари оширилган. Радиатор панжараси ўзгаришга учраган. Шунингдек, қўшимча ҳақ эвазига 21 дюймли ғилдиракларга эга бўлиш имконияти мавжуд.

Машина салонида 11,4 дюймли мультимедиа тизимини бошқариш учун дисплей ўрнатилган. У Pivi Pro 2 операцион тизимида ишлайди. Ҳавони тозалашнинг янги тизими — Cabin Air Purification Plus билан таъминланган. Ҳайдаш режимини ўзгартириш дастаги ҳам янгиланган.

Range Rover Evoque 2023 Европа бозорида 4 та версияда тақдим этилади: S, Dynamic SE, Dynamic HSE ва Autobiography. Шунингдек, бир нечта гибрид комплектациялиси ҳам бозорлардан жой олади. 

Автомобил двигателлари ҳам турлича бўлади. 1,5 литр ҳажмга эга бензинда ҳаракатланадиган турбодвигател, шунингдек, 2 литр ҳажмга эга бензинли ва дизелли двигателлар. Кроссовер 40 минг 80 евродан сотувга чиққан.

Мушук боқадиган робот

АҚШнинг O Sitter стартапи ҳайвонларга эгаси йўқлигида қарайдиган ақлли роботни намойиш этди. Қурилма ўйинчоқ, кузатув камераси ва овқатланиш идишидан иборат. Робот уй атрофида айланиб, ишда бўлганингизда мушукни кузатиб туриши мумкин. Агар мушук кўринмайдиган бўлса, смартфонингизга билдиришнома юборади ва мушукни топиш учун роботни бошқа жойга кўчириш сўралади.

Овқатланиш вақти келганида робот мушукка яқинлашади ва 2,5 литр егулик сиғадиган идишни очади. Махсус илова орқали овқатланиш вақти ва миқдорини белгилаш мумкин. Робот энага 199 доллар билан сотувга чиқарилган.

Google ўз фойдаланувчиларига пул тўлайди

Google корпорацияси 2010 йилда Қўшма Штатлар аҳолиси томонидан қўзғатилган жамоавий даъвони келишув орқали ҳал қилишга рози бўлди ва 23 миллион доллар товон тўлайди. Бу ҳақда SFGate хабар берди.

Суд жараёнида IT гиганти қидирув сўровлари ҳақидаги маълумотларни учинчи томонга бериш орқали шахсий ҳаётни бузганликда айбланган.

2006 йил 25 октябрдан 2013 йил 30 сентябргача Google қидирув тизимидан фойдаланган ҳар бир шахс 31 июлга қадар даъвога қўшилиши мумкин.

SFGate маълумотларига кўра, ҳозирги вақтда бир нафар даъвогар учун товон миқдори тахминан 7,7 долларни ташкил этади. Бунинг сабаби компенсация пули адвокат хизмати учун тўлов амалга оширилганидан кейин, барча ариза берувчилар ўртасида тенг қисмларга бўлиниши керак. Компенсация 2023 йил октябрь ойидан тўланиши кутилмоқда.

АҚШда сунъий гўшт сотувига рухсат берилди

АҚШ Қишлоқ хўжалиги вазирлиги Upside Foods ва Good Meat фирмаларига маданий гўшт деб аталадиган маҳсулотни ишлаб чиқаришга рухсат берди. Натижада, АҚШ Сингапурдан кейин лабораторияда етиштирилган гўштни сотишга рухсат берган иккинчи давлатга айланди. Upside Foods буни “орзулар рўёбга чиқиши” ва “янги даврнинг бошланиши” деб атади. 

Иккала Америка компанияси ҳам товуқ гўшти етиштириш билан шуғулланади. У пўлат контейнерларда ўстирилган ҳайвон ҳужайралари намунасидан олинади. 

YouTube видеоларни саралашда яна бир функцияни қайта ишга туширди

YouTube’даги каналлар видеоларини “энг охирги”, “машҳур” саралаш мезонлари орқали кўриш мумкин эди. Эндиликда улар орасига “Энг эски” функцияси яна қайтган. Ҳозирча бу функция тест режимида эканлиги айтилмоқда. Катта каналларда юзлаб видеолар мавжудлигини ҳисобга олсак, бу қулайликни оширишга хизмат қилади.

Volvo EX30

Volvo компанияси EX30 кроссоверини тақдим этди. Янги модель Volvo кроссоверлари ичида энг тезкори ҳисобланади. Электромобилнинг топ комплектацияси 100 км тезлик қайд этиши учун 3,6 сония кифоя қилади.

Моделнинг базавий комплектацияси 268 от кучига эга электромотор билан жиҳозланган. Автомобиль батареяси сиғими эса 54 кВт/соатни ташкил этади. Тўла қувват билан 344 км масофа босиб ўтиш мумкин. Шунингдек, 69 кВт/соат сиғимли батареяга эга версияда тўла қувват билан 480 км масофа босиб ўтиш мумкин. Топ комплектация иккита электромотор билан таъминланган, улар биргаликда жами 428 от кучини беради.

Volvo EX30 моделининг базавий комплектацияси учун 36 минг доллар нарх белгилаган. Етказиб бериш 2024 йилга мўлжал қилинган.