«Росгвардия»га оғир қуроллар ва танклар топширилади

«Росгвардия» ўз ихтиёрига танклар ва оғир қуролларни қабул қилиб олади, бу масала аллақачон Путин билан муҳокама қилинган, деди идора бошлиғи Виктор Золотов.

Фото: rosguard.gov.ru

«Росгвардия» танклар ва оғир қуролларни олади, деди 27 июнь, сешанба куни идора директори Виктор Золотов.

«Бу масала ҳозир жуда кескин. Бизда танклар ва бошқа оғир қуроллар йўқ. Биз буни қўшинларга киритамиз», - деди у ва бу масала Россия президенти Владимир Путин билан аллақачон муҳокама қилинганини қўшимча қилди. Золотовнинг сўзларига кўра, жиҳозлаш шартлари молиялаштиришга боғлиқ бўлади.

Евгений Пригожиннинг исёнини шарҳлар экан, Золотов «Вагнер» ХҲК колоннаси Россия бўйлаб шиддат билан ҳаракатлангани, чунки унинг ҳаракатларини қайтариш учун асосий кучлар Москва яқинида тўпланганини маълум қилди.

«Биз барча кучларимизни аниқ Москва чеккасига жамладик, чунки агар гуруҳни тарқатиб юборсак, улар шунчаки пичоқ каби ёғдан ўтиб кетишарди. Қайтариш учун мушт жамланган эди», деди у. Золотов исён пайтида ҳуқуқ-тартибот идораларининг ишини «жуда яхши» деб атади.

Евгений Пригожиннинг исёни тахминан бир кун давом этди, шу вақт ичида «Вагнер» ХҲК жангарилари Ростов-Дондаги ҳарбий объектларни эгаллаб олди ва Москвага йўлга чиқди, шаҳарга 200 километр етиб бормай, колонналарни жойлаштирди.

Тайёрлаган Отабек Матназаров

#танк #Росгвардия

23 июн куни кечқурун «Вагнер» раҳбари Евгений Пригожин РФ мудофаа вазирлигини вагнерчиларга ҳужум қилишда айблаб, «адолат марши» эълон қилди. 24 июн куни унинг қўшини Ростовни эгаллаб, Москва томон йўлга тушди.