Жаҳон банки экспертлари: Ўзбекистонда иқтисодий ўсиш 4,3 фоизгача ошади

Иқтисодий хусусиятга эга санкция чоралари қўлланилаётган геосиёсий турбулентлик туфайли жаҳон иқтисодиёти глобал иқтисодий ўсишга салбий таъсир кўрсатувчи мураккаб даврни бошдан кечирмоқда.

Фото: depositphotos.com

Жаҳон банкининг 2023-2025 йиллар учун Европа ва Марказий Осиё бўйича янгиланган баҳосига кўра, 2023 йилда бу минтақада иқтисодий ўсиш ўтган йилга (4,7 фоиз) нисбатан секинлашиб, ўртача 2,4 фоизни ташкил этиши кутилмоқда.

ХВЖнинг 2023-2025 йилларга мўлжалланган Глобал иқтисодий истиқболлар бўйича ҳисоботида глобал иқтисодий ўсиш кутилмалари январь ойидаги прогнозларга нисбатан 0,1 фоиз пунктга камайтирилган. Хусусан, ХВЖ 2023 йилда жаҳон иқтисодиёти атиги 2,8 фоизга, 2024 йилда эса 3 фоизга ўсишини кутмоқда.

Жаҳон банки экспертларининг фикрича, Марказий Осиёда иқтисодий ўсиш 2023 йилда ўртача 4 фоизни ташкил этади, 2024-2025 йилларда эса Ўзбекистон, Қозоғистон ва Тожикистонда амалга оширилаётган тизимли ислоҳотлар натижасида 4,3 фоизгача ошади.

2023 йилнинг 1-чораги учун Ўзбекистон Иқтисодий тадқиқотлар ва ислоҳотлар маркази прогнози юқори аниқликни кўрсатган. 2023 йилнинг биринчи чораги якунларига кўра, иқтисодий ўсиш 5,5 фоизни ташкил этди. Бу жорий йил бошида марказ экспертлари томонидан кутилаётган 5,47 фоиздан бир оз юқори бўлса-да, марказнинг 5,31 фоиз -5,62 фоиз прогноз коридорига тўғри келади.