Венгрия Ўзбекистонда паррандачилик кластерини ташкил этиш лойиҳасини бошлади

Жорий йилнинг 6 июль куни қишлоқ хўжалиги вазири Азиз Воитов ва Венгриянинг Bonafarm Group компанияси бош директори Аттила Чани ўртасида онлайн мулоқот бўлиб ўтди.

Фото: Қишлоқ хўжалиги вазирлиги

Мулоқот аввалида венгриялик ҳамкорлар Ўзбекистон қишлоқ хўжалиги соҳасидаги бугунги йиғим-терим ишларига қизиқишини билдирди. Шундан сўнг компания вазирликка мамлакат қишлоқ хўжалиги соҳасига сармоя киритиш шартлари, қиймати ва улар кўрсатилган ёзма таклифни яқин кунларда киритиш ниятида эканини билдирди.

Мулоқот чоғида, август ойи охирига қадар лойиҳа доирасида ишчи гуруҳ шакллантирилиб, ҳар икки томондан аниқ вакиллар бириктирилиши кераклиги ҳам таъкидланди.

Bonafarm Group компанияси 2009 йилда ташкил этилган бўлиб, Венгриядаги чорвачилик, сут, паррандачилик соҳаларида фаолият юритувчи энг йирик агро-озиқ-овқат гуруҳидир.

Ушбу йирик компаниянинг айланмаси 1,9 миллиард долларни ташкил этади. Бугунги кунда компанияда 8400 дан ортиқ ходим ва мутахассислар меҳнат қилмоқда.