Арестович Украинанинг ГФР - ГДР тамойилига кўра бўлиниши мумкинлигини истисно этмади

Киев томонидан назорат қилинадиган Украина ҳудудининг НАТОга қўшилиши ва мамлакатнинг Россия эгаллаб олган қисмига альянс кафолатлари тегишли бўлмаслиги Украина учун «супертарихий имконият» бўлади. Бу фикрни Украина президенти девони собиқ маслаҳатчиси Олексий Арестович журналист Юлия Латининанинг YouTube’даги эфирида билдирди. Украина ва Россия матбуоти 16 июль, якшанба куни ушбу баёнотга эътибор қаратди.

«Баъзи ишғол қилинган ҳудудлар Украина ҳукумати назоратидан ташқарида қолмоқда. Айтайлик, 80 фоизи (...) Аслида, биз, давлатнинг аксарият қисми учун урушни тўхтатиб, НАТОга аъзо бўламиз. Кўпчилик буни ўта тарихий имконият деб айтиши мумкин», деди Арестович. 

Шу билан бирга, у айрим таҳлилчиларнинг Украинага Қрим ва бошқа ҳудудларни озод этишдан бош тортишни ҳеч ким таклиф қилмаётгани ҳақидаги фикрларини эсга олди: «Улар шунчаки истиқбол йўқлиги сабабли буни ҳарбий йўл билан қилмасликни таклиф этмоқда. Ёки буни 200 минг эркак аҳолиси, генофонди, вайрон бўлган иқтисодиёти ва бошқа нарсани йўқ қилиш орқали ҳарбий йўл билан амалга оширса бўлади».

Арестовичнинг сўзларига кўра, биринчи сценарий «ГФР-ГДР варианти»ни эслатади: «ГФР НАТОга қўшилади, ГДР Германия ҳудуди сифатида тан олинган, лекин НАТО кафолатлари унга тааллуқли эмас». «Аслида, бу жуда яхши келишув. Қайсидир даражада ахлоқсиз, лекин жуда яхши», - деди Юлия Латининанинг суҳбатдоши.