Nissan Tiida 2024, Chevrolet Monza ва рақамли рубл – ҳафта технодайжести

Nissan Tiida 2024

Хитойда Nissan Tiida 2024 автомобили намойиш этилди. Хетчбек 122 от кучига эга 1,6 литрли двигатель билан жиҳозланган, 100 км масофага 6,1 литр бензин сарф қилади. Янгиланган моделига 8 дюймли экранга эга янги медиатизим ўрнатилган.

Nissan Tiida 2024’нинг базавий комплектацияси 12,5 минг, топ версияси эса 16 минг долларга баҳоланган.

Nokia 130

Янги Nokia 130 тугмачали телефони тақдим қилинди. Мобил телефон 2,4 дюймли экран билан жиҳозланган. Ўлчамлари 130,9 х 50,6 х 14 мм, оғирлиги 98,2 грамм. Оператив хотираси 4 МБ бўлиб, 32 ГБ гача бўлган хотира карталарини қўллаб-қувватлайди. Аккумулятори сиғими –1450 мА/соат. Ишлаш вақти кутиш режимида 30 кунни ташкил қилади. Суҳбат режимида эса аккумулятор қуввати 20 соатгача етади. Nokia 130 тўқ кўк, тилла ва бинафша рангларда сотувга чиқади. 

Chevrolet Monza

UzAuto Motors компанияси Chevrolet Monza ишлаб чиқаришни йўлга қўйиши мумкин. Ҳозирда ушбу моделдаги автомобилларни SKD усулида йиғиш имконияти кўриб чиқилмоқда.

Маълумот учун, Monza – Chevrolet компаниясининг энг арзон автомобилларидан бири. Бу моделнинг янгиланган 3 та версияси 2022 йилнинг сентябр ойида Хитойда 13 200 доллардан 15 200 долларгача бўлган нархларда сотувга чиқарилган.

Энг кучли андроид-смартфонлар

Antutu бенчмарки июль ойининг энг кучли андроид-смартфонлари рейтингини эълон қилди.

Биринчи ўринни Red Magic 8S Pro эгаллаган. Смартфон Snapdragon 8 Gen 2 процессори билан жиҳозланган бўлиб, тезкор хотираси 12 ГБ ва доимий хотираси 256 ГБ. 

Иккинчи ўринга худди шу процессор ўрнатилган iQOO 11C смартфони жойлашди. Унинг тезкор хотираси 16 ГБ ва доимий хотираси 512 ГБ.

vivo X90 Pro+ эса учинчи ўринга муносиб кўрилган. Унинг тезкор хотираси 12 ГБ ва доимий хотираси 256 ГБ.  

Энг кучли андроид-смартфонлар рўйхатига, шунингдек, iQOO 11Pro, vivo X90s, OPPO Find x6 Pro, nubia Z50s Pro, vivo X Fold2, Xiaomi 13 Ultra ҳамда OnePlus 11 смартфонлари киритилган.  

Рақамли рубл

Россияда 1 август куни рақамли рублни жорий этиш тўғрисидаги қонун кучга кирди - у электрон ҳамёнда сақланадиган рақамли код ҳисобланади. Рақамли рубл нақд ва нақдсиз пуллар билан бир қаторда миллий валютанинг учинчи шаклига айланади.

Марказий банк рақамли рубл кенг муомалага киришининг аниқ саналарини эълон қилмади, бироқ барча фуқаролар 2025-2027 йилларда янги пул шакли учун рақамли ҳамён очиши мумкинлигини истисно этмади. Тахминларга кўра, рақамли ҳамён мижознинг ҳисобрақамига эга бўлган банкнинг исталган мобил иловаси орқали очилиши мумкин. Шунингдек, рақамли ҳамённи банкнинг мобил иловаси орқали тўлдириш мумкин бўлади, бу ерда учинчи шахсларга пул ўтказиш ҳам мумкин. Рақамли рублдан фойдаланганда баланс ва нақд пул учун фоиз олинмайди.

iPhone 15даги ўзгаришлар

Тақдимот маросими сентябр ойида бўлиб ўтадиган iPhone смартфонлари сериясида янги тугма, каттароқ ўлчамдаги экран, яхшиланган камера ва процессор бўлади. Бу ҳақда Bloomberg нашри ўз манбаларига таяниб хабар берди.

Агентлик тарқатган маълумотларга кўра, стандарт iPhone 15 моделида илк бор Dynamic Island — фронтал камера учун қўшимча функционалларга эга кесим пайдо бўлади. Pro ва Pro Max сериялари дисплейлари LIPO технологиялари бўйича тайёрланади ва шу туфайли экран ҳошияси 0,7 ммга юпқалашади ва унинг кенглиги бор-йўғи 1,5 мм бўлади.

iPhone Pro’нинг дизайни ҳам ўзгаради: корпус рамаси титан қоришмасидан тайёрланади, орқа панели эса хиралаштирилган шишадан.

iPhone 15 базавий моделида илк бор одатий Lightning туйнуги ўрнида Android смартфонлариники каби USB-C В порти пайдо бўлади. Бу сим орқали маълумот узатиш тезлигини оширади, бироқ фойдаланувчилар учун қўшимча харажатларга олиб келиши мумкин, деб ёзади агентлик.

iPhone 15 смартфонларининг процессори ҳам ўзгаради — қурилмага iPhone 14 Pro ва 14 Pro Max’да ўтган йили фойдаланилган A16 чипи ўрнатилади. Ўз навбатида, Pro-моделлар янги, 3 нанометрли процессорга эга бўлади.

Бундан ташқари, iPhone 15 ва 15 Pro камералари ҳам жузъий тарзда ўзгартирилади. Гап, хусусан, 15 Pro Max телефонларидаги янги объективлар ва оптик яқинлаштиришнинг кенгайтирилган диапазони ҳақида бормоқда.