Украина бўйлаб зарбалар ва Лиман яқинидаги жанглар. Уруш суратлари

Украинада урушнинг 538-куни ўтди. Асосий маълумотлар:

• Россиялик ҳарбийлар Украина ҳудуди бўйлаб ёппасига ракета зарбалари йўллади. Лвивда турар жой бинолари ва болалар боғчаси зарбага учраган. Лвив области бўйича жами 19 киши жароҳат олган. 
• НАТО бош котиби офиси раҳбари Стиан Йенссен урушни тўхтатиши мумкин бўлган «эҳтимолий ечимлардан бири»ни айтди: Украина ўз ҳудудларининг бир қисмидан воз кечади ва алянсга аъзо бўлиб киради. Украина президенти офисидагилар бу таклифни «жуда ғалати» деб атади. Украина ТИВ эса бундай таклифни «мутлақо қабул қилиб бўлмаслиги»ни билдирди.
• Брянск области губернатори Александр Богомаз «украинларнинг диверсия гуруҳи» Россия ҳудудига кириб келишга урингани ҳақида хабар берди. Унинг сўзларига кўра, Украина ҚК зарбалари вақтида қишлоқ хўжалиги корхонаси ишчиси жароҳат олган.
• БМТ ҳисобларига кўра, Украинада август ойининг биринчи ярмида тинч аҳоли вакилларидан 48 киши ҳалок бўлган, яна 210 киши яраланган.

Лвив бўйлаб зарба

15 август тонгида Россия қўшини Лвивни ўққа тутди. Маҳаллий расмийларга кўра, 20 га яқин уй ва тахминан юзта квартира шикастланган. Ракеталардан бири болалар боғчаси ҳудудига келиб тушган, шунингдек портлаш тўлқини тиббиёт коллежи деразаларини тўкиб юборган. Ҳужум вақтида тинч аҳоли вакилларидан тўрт киши яраланган, ҳеч ким ҳалок бўлмаган.

Украина нашрлари Лвивга 15 август куни йўлланган зарбаларни уруш бошидан буён Украина ғарбига қилинган энг кенг кўламли зарбалар деб баҳолаган.

Лиман яқинидаги украин ҳарбийлари 

Краматорск бўйлаб зарба

15 августга ўтар кечаси Россия қўшини Краматорск бўйлаб ракета зарбаси йўллади. Отишма вақтида озиқ-овқат омбори ёниб кетган — юк ташувчи икки ишчи харобалар остида қолган, улардан бири ҳалок бўлган. Шунингдек, корхона омборчиси оғир жароҳат олган.