Кривий Риҳга ракета зарбаси ва фронт яқинида кунгабоқар ўрими. Уруш суратлари

Украинада урушнинг 562-куни ўтди. Асосий суратлар

Кривий Риҳда россияликлар ракетаси полиция биносига келиб тушди. 74 киши яраланган, жумладан тўққиз полициячи. Бир киши ҳалок бўлган.
Журналистлар аниқлашича, Россия Украина билан урушга кубаликларни ёппасига ёллаган. Куба ҳукумати текширув ишлари олиб бормоқда. Иш доирасида 17 киши ҳибсга олинган. Россия томони изоҳ бермаяпти.
Володимир Зеленский «Вагнер» ХҲК асосчиси Евгений Пригожинни Владимир Путин «ўлдиргани» ҳақида айтди. Украина президенти қандай асосга кўра бундай хулосага келганига аниқлик киритмаган.
Херсон областида россияликлар авиабомбаси портлаши оқибатида тинч аҳоли вакилларидан уч киши ҳалок бўлди. Суми шаҳри ўққа тутилиши оқибатида тўрт киши яраланган. Запорижжяда — бир ярадор.
РФ қўшини ҳафта давомида бешинчи бор Одесса областига дронлар билан ҳужум қилди. Вайронгарчиликлар ва жабрланганлар ҳақида маълумот йўқ.

Кун кадри. Запорижжя областидаги уй ҳовлисида танк гусеницаси

Кривий Риҳга зарба

Володимир Зеленский туғилган шаҳар — Днипропетровск областининг Кривий Риҳ шаҳрида — россияликлар ракетаси полиция биносига келиб тушди. Сўнгги маълумотларга кўра, 74 киши яраланган, бир полициячи ҳалок бўлган. Жабрланганларнинг тўққиз нафари — полициячилар, улардан уч нафари харобалар остидан чиқариб олинган.