Байден Зеленскийга ATACMS ракеталари партиясини ваъда қилди

Етказиб бериш айнан қачон бошланишига аниқлик киритилмаган.

Фото: Getty Images

АҚШ президенти Жо Байден украиналик ҳамкасби Володимир Зеленскийга Қўшма Штатлар Украинага ATACMS оператив-тактик ракеталарининг кичик партиясини юборишини айтган. Бу ҳақда NBC News телеканали ўз манбасига таянган ҳолда хабар бермоқда.

Телеканал суҳбатдоши ракеталар қачон етказиб берилиши ва бу ҳақда қачон расман хабар берилишига аниқлик киритмаган.

Ўз навбатида, The Washington Post Байден маъмурияти Киевга ATACMS ракеталарининг оддий вариантини эмас, кассетали жанговар каллакка эга вариантини юборишга яқин экани ҳақида хабар берган.

Украина узоқ масофага етиб борувчи ATACMS ракеталарини кўп ойлардан буён сўраб келади. Уларнинг ҳаракатланиш радиуси — 300 километрни ташкил этади; Киев уларни Россиянинг халқаро тан олинган ҳудудларидаги нишонларга қўлламасликни ваъда қилган.
Байден ва Зеленский 21 сентябр куни Оқ уйда учрашди. Украина президенти кенг кўламли уруш бошланганидан буён иккинчи бор АҚШга келди. ОАВ ушбу учрашув якунларига кўра ATACMS ракеталари етказиб берилиши тўғрисида расман эълон қилинишини кутганди, аммо бундай бўлмади.