Исроил Ғазо шимолида ҲАМАС тугатилганини эълон қилди

ҲАМАС энди Ғазо шимолидаги уюшган ҳарбий куч эмаслиги айтилмоқда.

Фото: Reuters

Фаластиннинг ҲАМАС ҳаракати Ғазо сектори шимолида уюшган ҳарбий тузилма сифатида амалда ўз фаолиятини тўхтатди. Бу ҳақда Исроил мудофаа кучлари (ЦАҲАЛ) матбуот хизмати эълон қилди.

Ҳисоботда қайд этилишича, мамлакат ҳарбийлари Фаластин анклавининг шимолидаги ҲАМАС нишонларига фаол ҳужум қилган. Бундан ташқари, 13 ноябр куни Исроил аскарлари ушбу ташкилотнинг баталёнларига қарши бир нечта жангларда қатнашган. Улардан иккитаси жиддий йўқотишларга учрагани, қўмондонлар, 200 нафарга яқин жангчи йўқ қилингани айтилмоқда.

«Ушбу баталёнларнинг оператив жанговар қобилияти жиддий равишда бузилган ва амалда Ғазо секторининг шимолий қисмидаги ҲАМАС ҳарбий тузилмалари уюшган ҳолда қаршилик кўрсатишни тўхтатди», дейилади баёнотда.

Исроил мудофаа кучлари маълумотига кўра, можаро авж олгандан сўнг Фаластин анклавида 30 минг ҳамасчи бўлган, Улар бешта ҳудудий бригада, 24 та алоҳида баталён ва 140 та ротага бўлинган. Ҳар бир бригадада танкка қарши қуроллар ва снайперлик қуроллари бўлган. Бундан ташқари, фаластинлик жангчилар турли муҳандислик ресурсларига эга эди.

#Исроил #Фаластин #Ҳамас

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.