Янги Тошкент шаҳрининг бош режаси лойиҳаси учун биринчи босқичда 40 млрд сўм ажратилади

Маҳаллий кенгашнинг 2023 йил 4 декабрдаги қарори билан депутатлар Тошкент шаҳар маҳаллий бюджетидан қатор тадбирларга маблағ ажратишни тасдиқлаган. Улар орасида Янги Тошкент шаҳрининг бош режаси лойиҳаси ҳам бор.

Тошкент шаҳри ҳокими вазифасини бажарувчи Шавкат Умурзоқовнинг жорий йил 10 июлдаги қарорида ҳокимлик ва “ToshkentboshplanLITI” ДУК ўртасида тўғридан тўғри шартнома тузилгани айтилади. Шартномага кўра биринчи босқичда маҳаллий бюджетнинг қўшимча манбалари ҳисобидан 40 млрд сўм ажратилиши кўзда тутилган. Ҳужжат билан Тошкент шаҳрининг янги бош режаси “Янги Тошкент” лойиҳасини амалга ошириш бўйича буюртмачи этиб пойтхат ҳокимлиги “Ягона буюртмачи хизмати” инжиниринг компанияси белгиланган.

5 сентябр куни Янги Тошкент шаҳрининг бош режаси лойиҳаси президентга тақдим этилган, янги шаҳарни ҳозирги Тошкент билан муваффақиятли бирлаштиргани учун Буюк Британиянинг Cross Works архитектура компанияси таклиф этган лойиҳа танлаб олинганди.