Олмаотада автобус йўловчи ва ҳайдовчи ўртасидаги можаро туфайли одамларни уриб юборди 

Олмаотада йўловчи автобуси бекатда турган одамларни уриб юборди, оқибатда уч киши ҳалок бўлди, яна тўрт киши жароҳат олиб шифохонага ётқизилди. Дастлабки маълумотларга кўра, бунга йўловчилардан бири ҳайдовчи аёлни ургани сабаб бўлган. 

Полициянинг қайд қилишича, 22 декабр куни кечқурун 47-йўналишдаги автобусда йўловчи ва ҳайдовчи аёл ўртасида можаро келиб чиққан. Оқибатда, йўловчи ҳайдовчи аёлни урган, у эса ҳушидан кетган. Шунда автобус бошқарувдан чиқиб, тўртта автомобил билан тўқнашган. Шунингдек, бекатдаги бошқа йўловчиларни уриб юборган. 

Ҳодиса оқибатида уч одам ҳалок бўлгани, бир қанча йўловчилар, жумладан ҳайдовчи аёл ҳам жароҳат олгани айтилмоқда. 

Автобусда жанжал кўтарган эркак қўлга олинган. Унга нисбатан «безорилик» моддаси бўйича жиноят иши қўзғатилган ва тергов изоляторига жойлаштирилган. 

Шунингдек, «Транспорт воситасини бошқаришда йўл ҳаракати қоидаларини бузиш оқибатида икки ёки ундан ортиқ шахснинг ўлимига сабаб бўлиш» моддаси бўйича жиноят иши қўзғатилиб, экспертиза тайинланган.