Францияда 4 мингдан ортиқ француз фуқароси Ғазода Исроил армияси сафида жанг қилаётгани танқид остига олинди

Ғазога ташриф буюрган БМТнинг фаластинлик қочқинларга ёрдам бериш ва ишларни ташкил қилиш агентлиги олий комиссари Филиппе Лаззарини Исроил армияси томонидан қарийб барча инфратузилма вайрон қилинган Ғазо сектори энди яшаш учун яроқли маскан эмаслигини қайд этган.

БМТ бош котибининг ҳуманитар масалалар бўйича ўринбосари Мартин Гриффитснинг яқинда қайд этишича, шу пайтгача қуролли ҳарбий можаролар чоғида содир этилган жиноятлар учун жазосизлик даражаси бу қадар юксак бўлмаган. Шу муносабат билан у Ғазо секторидаги вазият бўйича махсус трибунал ташкил этилишини ҳам эҳтимолли деб ҳисоблашини айтган.

Бу воқеалар фонида Исроил армиясининг хатти-ҳаракатларини танқид қилиш ҳаттоки фуқаролари ЦАҲАЛ таркибида жанг қилаётган мамлакатларда ҳам ортган.

Шу кунларда Europe 1 томонидан ўтказилган сўровларга кўра, ЦАҲАЛнинг 4185 нафар аскари Франция фуқароси эканлиги маълум бўлди. Шу муносабат билан Жан Люк Меланшоннинг “Енгилмас Франция” ўта сўл партиясидан парламент депутати Томас Портес Исроил армияси сафида Ғазо секторида жанг қилаётган 4 мингдан ортиқ французларнинг бу ишини қоралаб коммюнике эълон қилди.

Унда депутат ўзга мамлакат армияси сафида жанг қилаётганлар Францияда ҳарбий жинояти учун судланиши кераклигини талаб қилган.

«Бу Америка Қўшма Штатлари контингентидан кейинги ўриндаги энг йирик контингент», — деган Томас Портес.

«Ғазо секторида ҳам, Ўрдун дарёсининг ғарбий соҳилида ҳам содир этилаётган ҳарбий жиноятларга келсак, уларда француз фуқароларининг иштирок этишига тоқат қилиб бўлмайди. БМТ ўзининг махсус маърузачилари чиқишларида геноцид хавфидан огоҳлантириб турганда, 17 мингдан ортиқ тинч фуқаролар ўлдирилганини хабар қилиб турганда, француз миллатига мансуб фуқароларнинг у ерда бўлиши Францияга иснод келтиради”, — дея таъкидлаб ўтган Томас Портес.

Ўз коммюникесида Портес яна қуйидагиларни қайд этади: “Франция бу ҳарбий жиноятлардаги иштирокни энг қатъий тарзда қоралаши керак. Мен адлия вазирига илтимос билан мурожаат қилмоқчиман, токи ҳарбий жиноятларда айбдор француз фуқаролигига эга шахслар (жумладан, қўшфуқароликка эга шахслар ҳам) Франция одил суди орқали жавобгарликка тортилиши керак. Мустамлакага айлантириш инсониятга қарши жиноят саналиши важидан, Фаластин ерларида иштирок этаёган француз фуқаролигига эга шахслар ҳам одил суд олдида ўз қилмишлари учун жавоб бериши керак».

Портес ўз чиқишида Франция Фуқаролик кодексининг 23-8-моддасига ишора қилган. Унга кўра, хорижий армия сафида ёки хорижий давлат органида ёки Франция аъзо бўлмаган халқаро ташкилотда мансабга эга бўлган француз Франция фуқаролигини йўқотади.