Тошкентда Трансафғон темирйўли қурилишини жадаллаштириш муҳокама қилинди

Транспорт вазири Илҳом Маҳкамов Афғонистон транспорт ва фуқаро авиацияси вазири вазифасини бажарувчи Ҳамидулла Охунзода билан Тошкентда Трансафғон темирйўли қурилиши лойиҳасини жадаллаштиришни муҳокама қилди.

Фото: Транспорт вазирлиги

Жорий йилнинг 26 декабр куни Ўзбекистон транспорт вазири Илҳом Маҳкамов Афғонистон транспорт ва фуқаро авиацияси вазири вазифасини бажарувчи Ҳамидулло Охунзода бошчилигидаги делегация вакиллари билан учрашув ўтказди.

Транспорт вазирлиги хабарига кўра, учрашувда томонлар транспорт ва логистика соҳасидаги ҳамкорлик алоқаларини ривожлантириш мақсадида бир қатор масалаларни кўриб чиқди.

Жумладан, автомобил ташувларида ундириладиган йиғим ва тўловларни паритет асосида ундирилишини таъминлаш ҳамда Афғонистон ҳудуди орқали транзит ҳамда икки томонлама ташувларни ривожлантириш муҳокама қилинди.

Бундан ташқари, темирйўл ташувларидаги тариф ставкаларига имтиёзлар тақдим этиш, «Ўзбекистон – Афғонистон – Покистон» темирйўл қурилиши лойиҳасини жадаллаштириш билан боғлиқ масалалар кўриб чиқилди.