Бухорода мухбирни пичоқлаган шахс қўлга олинди

6 феврал куни Бухоро вилояти, Шофиркон туманида жойлашган кафеда Taftish ахборот агентлигининг Бухородаги мухбири пичоқланди. Бош прокуратура хабарига кўра, буни содир қилган шахс қўлга олинди. 

Қайд қилинишича, гумонланувчи А.А. ва жабрланувчи Ў.Т. орасида аввалдан низо бўлган. Шу сабабли, А.А. кафеда пичоқни Ў.Т. қорин қисмига бир маротаба санчиб, тан жароҳати етказган. 

Ҳолат юзасидан Шофиркон тумани прокуратураси томонидан Жиноят кодексининг 25, 97-моддаси 1-қисми (Қасддан одам ўлдиришга суиқасд қилиш) билан жиноят иши қўзғатилиб, 7 феврал куни унга нисбатан «қамоққа олиш» эҳтиёт чораси қўлланилган. 

Жабрланувчи Ў.Т. ҳозир шифохонада даволанаётгани таъкидланмоқда. Унинг аҳволи қандайлиги ҳақида хабарда маълумот берилмаган.