Bloomberg: Киев россияликлар УҚК мудофаасини ёриб ўтишидан хавотирланяпти

Bloomberg агентлиги маълумотига кўра, Украина расмийлари жорий йилнинг ёзигача Киев иттифоқчилари ўқ-дорилар етказиб беришни сезиларли даражада ошира олмаса, Россия қуролли кучларининг ҳужуми сезиларли кучайиши мумкинлигидан хавотирда. Шу билан бирга, Украина расмийлари россияликларнинг Украина қуролли кучлари мудофаасини ёриб ўтиши хавфини кўрмоқда, деб ёзади агентлик 29 феврал, пайшанба куни Украина расмий органлари таҳлиллари билан таниш бўлган манбага таяниб. 

Шу билан бирга, Киевнинг жанг майдонидаги вазиятга баҳоси тобора аянчли бўлиб бормоқда, чунки украин бўлинмалари Россия ҳужумларини ушлаб туриш учун курашмоқда ва отилиши мумкин бўлган снарядлар сонини захирасини сақлаб қолиш мақсадида чекламоқда, дея таъкидлайди Bloomberg. Украина шарқидаги Авдийивка ва яна бир қанча қишлоқларнинг қўлдан чиқарилган, шунингдек, Конгресс АҚШ муҳим ёрдамини кечиктиргани Украина мудофааси Россия ҳужумига дош бера олмаслиги ҳақидаги хавотирларни кучайтирди. Бу Киевнинг иттифоқчилари учун огоҳлантириш қўнғироғи бўлиши керак, дея агентлик номи ошкор этилмаган европалик амалдорнинг сўзларини келтиради. 

«РФ ҳали ҳам Киев ва Одессани эгалламоқчи» 

Россия президенти Владимир Путин ҳамон Украинанинг йирик шаҳарларини, жумладан Киев ва Одессани қўлга киритишга интилмоқда, деб ёзади Bloomberg Украина разведкаси маълумотларига таяниб. Одессанинг босиб олиниши унга Украинадан ғалла экспортини тўхтатишга ва Кишинёв билан қарама-қаршиликда Россия Федерациясидан ҳимоя сўраган Днестрбўйига киришга имкон беради. 

Шу билан бирга, агентлик Россия жорий ҳарбий кампания натижаларига қараб ёзда Украина мудофаасини ёриб ўтиш учун секин ҳужумни давом эттириш ёки каттароқ зарба бериш учун ресурсларни тўплаш тўғрисида қарор қабул қилишини билдирди. Икки йиллик уруш Россия кучларини толиқтириб юборди, шу боис кенг кўламли ҳужум Кремл учун муаммо бўлади, дейди нашр.

Шу куни Россия президенти Федерал мажлисга мурожаати чоғида «россияликларнинг мутлақ кўпчилиги» Украинага қарши бошланган урушни қўллаб-қувватлашини айтди. Бундан ташқари, у Украина ҳудудига хорижий қўшинлар юборилса, бу «фожиали оқибатларга олиб келиши» билан таҳдид қилди ҳамда Ғарбни «Украина, Яқин Шарқ ва дунёнинг бошқа минтақаларида можароларни қўзғатаётганликда» айблади.