Тошкент метросининг иккита янги бекати 11 мартдан ишга тушади

Тошкент метрополитени Ер усти ҳалқа йўлининг Турон (13-бекат) ва Қипчоқ (14-бекат) бекатлари 11 март, душанба куни ишга тушади. Бу ҳақда «Тошкент метрополитени» хабар берди.

Белгиланган техник синов ишлари якунланган. Бекатлар 11 март эрталабдан одатий режа асосида йўловчилар учун хизмат кўрсатишни бошлайди. 

Таъкидланишича, 7 март куни Тошкент шаҳрига янги 12 та метро вагони келтирилган. Май ойи сўнгига қадар эса яна 20 та замонавий метро вагонлари келтирилиши режа қилинган. 

Аввалроқ Kun.uz сўровига Транспорт вазирлиги «Турон» ва «Қипчоқ» бекатларидаги синов жараёнлари жорий йилнинг 15 мартига қадар ўтказилишини маълум қилганди.

Эслатиб ўтамиз, Қурувчилар даҳасидан Сергели мавзесигача бўлган «Турон» ва «Қипчоқ» метро бекатларининг қурилиши 2023 йил сўнгида якунланиб, 15 декабр куни поездлар ҳаракати синов тариқасида бошланганди.

Қўйлиқдан Сергелигача бўлган ерусти ҳалқа йўли жами 7 та метро бекатини ўз ичига олган. Унинг қурилиши 2020 йилнинг декабр ойидан бошланган. 2023 йил апрел ойида бекатларнинг 5 таси аҳолига фойдаланишга топширилганди.