Тадбиркорга қарийб 886 млн сўмлик қарздорлик ундириб берилди

Бизнес-омбудсманга “Autsorser-Agro”(номи ўзгартирилган) МЧЖ раҳбари томонидан Қизилтепа туманидаги мактабгача таълим бўлими ходимларининг ҳаракатларидан норози бўлиб мурожаат йўлланган.

Аниқланишича, тадбиркор шартнома асосида 2023 йилнинг сентябр ойидан декабр ойига қадар 4 ой давомида аутсорсинг усулида овқатлантириш хизмати кўрсатиб келган

Бироқ, кўрсатилган хизмат учун юзага келган 886,5 млн сўм карздорликни тўлаш пайсалга солиниб, тўловни амалга ошириш ўрнига тадбиркорга нисбатан турли хил текширувлар амалга ошириш ҳолатлари кузатилган.

Ўз ўрнида бу холат тадбиркорнинг фаолиятига салбий таъсир ўтказиб, махсулотлар етишмовчилиги, иш хақлари, солиқ ва бошқа бир қанча тўловларни амалга оширишда қийинчиликларни юзага келтирган.

Бизнес-омбудсман аралашуви билан тадбиркорнинг муаммоси ижобий хал қилиниб, қарздорлик тўлаб берилган.