ХОҚ: Париждаги Олимпиадада 40 га яқин россиялик қатнаша олади

ХОҚ вице-президенти Жон Коутс 40 га яқин россиялик спортчининг Париждаги ёзги ўйинларга нейтрал мақомда бориши ҳақидаги хабарларни ҳақиқатга яқин, деб ҳисоблайди.

Фото: Alain Apaydin/abaca/picture alliance

Париждаги ёзги Олимпиада ўйинларида 40 га яқин россиялик спортчи нейтрал мақомда иштирок этиши мумкинлиги ҳақидаги хабарлар ҳақиқатга яқин бўлиши мумкин. Бундай баҳони Халқаро олимпия қўмитаси (ХОҚ) вице-президенти Жон Коутс билдирди, деб ёзади 17 март, якшанба куни Reuters.

Шу билан бирга, Коутс бу масала бўйича аниқ маълумотларни билмаслигини таъкидлади. 2022 йил февралида Россия томонидан Украинага қарши бошланган уруш туфайли ХОҚ россиялик ва беларуслик спортчиларнинг Олимпиададаги иштирокини сезиларли даражада чеклади.

Россиялик спортчилар учун чекловлар

ХОҚнинг 2023 йил декабр ойида қабул қилинган қарорига кўра, Россия Федерацияси ва Беларуснинг урушни қўллаб-қувватлаётгани тахмин қилинаётган спортчилари ўз мамлакатлари миллий байроқларисиз, фақат индивидуал йўналишлар бўйича мусобақаларда қатнашиши мумкин. Украинага қарши урушни фаол қўллаб-қувватлаган ёки Россия ёки Беларус қуролли кучлари ёки миллий хавфсизлик ташкилотлари билан боғлиқ бўлган спортчилар ўйинларда қатнаша олмайди.

Украина ташқи ишлар вазири Дмитрий Кулеба ХОҚнинг россиялик спортчиларга Олимпиадада иштирок этишига рухсат бериш қарорини кескин танқид қилиб, буни «уят» деб атади. Айни пайтда Париж мэри Анн Идалго март ойи бошида россиялик ва беларуслик спортчилар ўйинларга келмаслигига умид билдирди. Франция пойтахти учинчи бор ёзги Олимпия ўйинларига мезбонлик қилади.

РОҚ россияликларнинг Олимпиадада иштирок этиш шартлари тўғрисида

Россия Олимпия қўмитаси (РОҚ) россияликларнинг Париждаги ўйинларда иштирок этиши учун қўйилган шартларни «адолатсиз» деб атади, бироқ РОҚ «бойкот йўлига ўтмаслигини» таъкидлади.

«РОҚ ҳеч қачон Олимпиада ўйинларини бойкот қилгани йўқ, биз РОҚ сифатида ҳеч қачон бойкот йўлидан бормаймиз. Ҳар доим россиялик олимпиячиларнинг ушбу мусобақаларда иштирок этишини қўллаб-қувватлаймиз, лекин фақат камситмасдан, тенг шартлар асосида. Афсуски, Париж-2024 россиялик олимпиячиларни тенг шароит билан таъминлай олмайди, шу муносабат билан савол туғилади - нега россиялик спортчилар учун бундай адолатсиз шароитлар?» - деди 14 март куни РОҚ президенти Станислав Поздняков.

Шу билан бирга, 23 феврал куни РОҚ ўзининг Telegram-каналида спортчиларнинг ХОҚ томонидан жорий этилган бетарафликка риоя қилиш амалдаги мезонларига розилик бериши «Россия қонунчилиги бузилишига олиб келиши мумкинлиги» ҳақида огоҳлантирди.

«Тегишли комиссиялар ва РОҚ аппарати мавжуд шароитларни синчковлик билан таҳлил қилиб, бундай розиликнинг мумкин бўлган ҳуқуқий ва бошқа салбий оқибатлари тўғрисида Бутунроссия спорт федерацияларини хабардор қилиш учун кенг қамровли чоралар кўрмоқда», дея маълум қилди ташкилот.