«Уруш фақат тириклар ва ўликларга ажратади». Украин кўнгиллилари Донбассда ҳалок бўлганларнинг жасад қолдиқларини қидирмоқда

Украинада урушнинг 770-куни ўтди. Асосий маълумотлар:

Володимир Зеленский Россия «1 июнгача» қўшимча 300 минг кишини сафарбар қилмоқчилигини айтди. Кремл буни рад этди.
Украина ҳарбий разведкаси 2024 йилнинг биринчи ярмида Қрим кўпригига янги ҳужумни тайёрламоқда, деб хабар берди The Guardian.
РФ мудофаа вазирлиги «Крокус»даги терактдан кейин шартнома асосида хизмат қилиш истагини билдираётганлар сони ортганини маълум қилди. Вазирликка кўра, кўнгиллилар «қурбонлар учун қасос олиш» истагини билдирмоқда.
Татаристон раҳбари региондаги корхоналарни ҳаво ҳужумидан мудофаа кучларига ишониб қолмасдан, дронлар ҳужумидан мустақил ҳимояланишга чақирди.
Politico нашри Хитой, Саудия Арабистони ва Индонезия Евроиттифоқнинг Россия активларини мусодара қилиш бўйича режасига қўшилмаганини хабар қилди.
Франция мудофаа вазири Парижда Украинанинг «Крокус»даги терактга алоқадорлиги тўғрисида маълумот йўқлигини айтди.

Кун кадри. Лиман атрофида ёниб кетган дала

Украинадаги жангларда Россия қўшини ҳам, Украина қуролли кучлари ҳам кассетали ўқ-дорилардан фойдаланмоқда — бу кенг майдонга тарқаладиган майда суб ўқ-дорилардан иборат ажралувчи қисмга эга снарядлардир. Бундай ўқ-дорилар жаҳоннинг кўплаб мамлакатларида тақиқланган, чунки улар айрим ҳолларда портламай қолади ва улар қўлланган ҳудудлар миналардан тозаланмаган ҳолатида тинч аҳоли ҳаёти учун хавфли ҳисобланади. Россия ҳам, Украина ҳам, Украина қуролли кучларига қурол етказиб бераётган АҚШ ҳам кассетали ўқ-дорилардан фойдаланишни тақиқловчи конвенцияни имзоламаган.

Лиман атрофида кассетали ўқ-дорилар қўлланиши оқибатида ёниб кетган дала
Wolfgang Schwan / Anadolu Agency / ABACAPRESS / ddp images / Vida Press

Украинадаги қидирувчилар ҳалок бўлган аскарларнинг жасадлари билан

Россия ва Украина ўртасида кенг кўламли уруш кетаётганига икки йилдан ошди. РФ мудофаа вазирлиги ва Украина қуролли кучлари рақиб йўқотишлари тўғрисида тез-тез хабар бериб туради (бу маълумотларни мустақил манбалар орқали оператив тасдиқлаш имконсиз), аммо ўз йўқотишлари ҳақида жуда кам маълумот беради. Украина президенти 2024 йил феврал ойи охирида РФнинг кенг кўламли босқини бошланганидан буён 31 минг украин ҳарбий хизматчиси ҳалок бўлганини маълум қилган. «Медиазона» ва BBC рус хизмати журналистлари, шунингдек кўнгиллилар жамоаси март ойи охирига келиб Украинада ҳалок бўлган россиялик ҳарбийлардан 49 281 нафарининг шахсини тасдиқлаган. Икки томондан ярадор бўлган, асир тушган ва бедарак йўқолган ҳарбийлар ҳақида тўлиқ расмий маълумотлар йўқ. Айрим украиналик ва россиялик аскарларнинг тақдирига шиддатли жанглар кечаётган ҳудудларда, жумладан Донецк областида ишлаётган кўнгиллилар ойдинлик киритмоқда.