Россияда «Я/Мы Сергей Фургал» ҳаракати «террорчилар» рўйхатига киритилди

Росфинмониторинг «Я/Мы Сергей Фургал» минтақалараро жамоат ҳаракати»ни «террорчилар ва экстремистлар» реестрига киритди, деб ёзади ТАСС 26 апрел, жума куни департамент маълумотларига таяниб. 

Феврал ойида Хабаровск ўлкаси суди «ҳаракат»нинг Россия ҳудудидаги фаолиятини ноқонуний деб топди ва уни «экстремистик» ташкилот деб эълон қилди. Шу билан бирга, «Медуза» ёзишича, очиқ манбаларда «ўз уюшмасини «Я/Мы Сергей Фургал» деб атайдиган фаоллар гуруҳи ҳақида ҳеч қандай маълумот йўқ».

Хабаровск ўлкасининг собиқ губернатори Сергей Фургал 2020 йил июлида буюртма қотилликларига алоқадорликда айбланиб қўлга олинган эди. Унинг ҳибсга олинишидан кейин минтақада оммавий норозилик намойишлари бошланиб, бир неча ой давом этди. 2023 йилнинг февралида Фургал 22 йилга озодликдан маҳрум этилди. Унинг ўзи Адлия вазирлигининг уни қўллаб-қувватлаган «ҳаракат»ни экстремистик деб тан олиш ҳақидаги қарорига изоҳ берар экан, «бундай ҳаракат ҳақида билмаслигини» айтди.

Адлия вазирлиги «террорчилар» рўйхатига яна бир мавжуд бўлмаган ҳаракатни қўшишни талаб қилди

Россия Адлия вазирлиги 26 апрел, жума куни шунингдек, «Антироссийское сепаратистское движение»ни «экстремистик ташкилот» деб тан олишни талаб қилди, дейилади вазирлик сайтида. Адлия вазирлиги ушбу «халқаро ижтимоий ҳаракат» «Россиянинг кўп миллатли бирлиги ва ҳудудий яхлитлигини бузиш» билан шуғулланади, деб ҳисоблайди.

Россиянинг «ОВД-Инфо» инсон ҳуқуқлари ташкилоти ўзининг Telegram-каналида «бундай номдаги ташкилотни топа олмагани» ҳақида хабар берди.

Россияда мавжуд бўлмаган ҳаракат «экстремистик» деб тан олинган

Аввалроқ Россияда мавжуд бўлмаган ҳаракат «экстремистик» деб тан олинган эди. Март ойининг ўрталарида у экстремистик деб эълон қилиниши муносабати билан Россия Федерациясида экстремистик ҳамжамиятни ташкил этиш ёки унда иштирок этиш бўйича биринчи иш очилди (РФ Жиноят кодексининг 282.1-моддаси). Оренбургдаги бар ходимлари айбланувчиларга айланди.