Одессада ёниб кетган «Ҳарри Поттер қалъаси» ва Черкассда футбол ўйнаётган фахрийлар. Уруш суратлари

Украинада урушнинг 796-куни ўтди. Асосий маълумотлар:

РФ қўшини Одесса бўйлаб ракета зарбаси йўллади. Беш киши ҳалок бўлган, камида 25 киши яраланган.
Telegram Украина разведкаси ва Украина хавфсизлик хизматининг чат-ботларини бир неча соатга блоклади.
Латвия, Литва ва Эстония Россияни Болтиқ денгизи ҳудудида GPS сигналларини ўчириб қўйишда айблади.
Financial Times: Европанинг йирик банклари 2023 йилда Россияда урушга қадар бўлганидан тўрт баробар кўпроқ солиқ тўлаган.
РФ мудофаа вазирлиги россиялик ҳарбийлар Донецк областидаги Семеновка аҳоли яшаш пунктини эгаллагани ҳақида хабар қилди.
Украина инсон ҳуқуқлари ҳимояси бўйича Европа конвенциясидан «вақтинча қисман четга чиққани» хабар қилинди.

Одесса бўйлаб зарба оқибатлари

Россия қўшини 29 апрел куни навбатдаги марта Одесса бўйлаб ракета зарбаси йўллади. Беш киши ҳалок бўлган. 30 апрел тонгидаги маълумотларга кўра, 25 киши жароҳатланган. Саккиз киши − оғир аҳволда, улардан тўрт нафари − ўта оғир аҳволда, жумладан тўрт ёшли қизча ҳам, деб хабар берган област маъмурияти раҳбари Олег Кипер. Ракета билан ўққа тутиш оқибатида турар жойлар ва маъмурий бинолар шикастланган. Одесса юридик академиясининг (Халқаро гуманитар университетнинг собиқ қабул уйи) талабалар саройи биноси ёниб кетган, уни «Ҳарри Поттер қалъаси» деб ҳам аташарди.

State Emergency Service of Ukraine / Scanpix / LETA

Sergey Smolentsev / Reuters / Scanpix / LETA

Украин нашрлари ёзишича, «Ҳарри Поттер қалъаси» Сергей Киваловнинг қароргоҳи ҳисобланган — у Олий Раданинг Регионлар партиясидан собиқ депутати. Кивалов аввалроқ ректор бўлган, ҳозирда «Ҳарри Поттер қалъаси» ҳам тасарруфида бўлган Одесса юридик академияси президенти лавозимида эди.
Oleksandr Gimanov / AFP / Scanpix / LETA

Кивалов ушбу кошонада яшагани ҳақидаги хабарларни рад этган, гарчи 2015 йилда, саройга «Автомайдан» активистлари бостириб кирганида, ижтимоий тармоқларда бино деворларида унинг портрет ва фотосуратлари илингани акс этган кадрлар пайдо бўлганди. Кивалов ҳам 29 апрел кунги ракета зарбасидан жароҳатланганлар рўйхатида қайд этилган, уни бел соҳасида осколка жароҳати билан шифохонага ётқизишган. «Ҳарри Поттер қалъаси» ёнғин оқибатида деярли буткул яксон бўлган
Украина ФВДХ

Ракета зарбаси оқибатида 30 дан ортиқ киши турли даражадаги оғирликда жароҳатлар олган, деб хабар берган Одесса области ҳарбий маъмурияти
Igor Tkachenko / EPA / Scanpix / LETA

30 апрел куни Одесса областида шаҳар бўйлаб ракета зарбаси қурбонлари хотирасига мотам куни эълон қилинди
Украина ФВДХ

Одесса области ҳарбий маъмурияти раҳбари Олег Кипер ҳаво ҳужумидан мудофаа кучлари уриб туширган Россия ракетаси парчасини кўздан кечирмоқда
Фото: Одесса области ҳарбий маъмурияти раҳбарининг Telegram-канали

Донбасс шимолида Украинанинг «Град» тизими

РФ қуролли кучлари Донецк областида юриш қилишга уринишларини давом эттирмоқда. Апрел ойи охирига келиб Россия қўшини Очеретино йўналишида фронт чизиғини ёриб ўтди, бу эса Украина қуролли кучлари Донбасснинг жануби ва ғарбида тўлиқ мағлубиятга учрашига олиб келиши мумкин. Украина қуролли кучлари бош қўмондони Олександр Сирский 28 апрел куни украин ҳарбийлари қатор йўналишларда чекингани, жумладан «Бердичи, Семеновка ва Новомихайловкадан ғарбдаги марраларга кўчиб ўтгани»ни маълум қилди. РФ мудофаа вазирлиги 29 апрел куни феврал ойидан буён шиддатли жанглар майдони бўлган Семеновка қишлоғи тўлиқ назорат остига олинганини эълон қилди.