“Ватандошлар” жамоат фонди делегацияси Германиядаги ўзбекистонликлар билан учрашди

Германиядаги Ўзбекистон элчихонасида “Ватандошлар” жамоат фонди томонидан ўша ерда истиқомат қилаётган ва таҳсил олаётган ўзбекистонликлар ўртасида учрашувлар ва “Заковат” интеллектуал ўйини ташкил этилди.

Хорижда яшовчи ўзбекистонликлар билан ҳамкорлик алоқаларини олиб бораётган “Ватандошлар” жамоат фонди вакилларидан ибора делегация шу кунларда Германиядаги ватандошларимиз билан учрашмоқда. Германиянинг Берлин шаҳрида жойлашган Ўзбекистон элчихонасида Германиянинг турли ҳудудларида меҳнат қилаётган ва таҳсил олаётган бир гуруҳ ватандошларимиз жам бўлишди. Учрашувда ёшлар “Заковат” интеллектуал клуби вакиллари иштирокида “Заковат” интеллектуал ўйини ташкил этилди. Ўйинда ғолиб жамоага “Ватандошлар” жамоат фонди томонидан Ўзбекистоннинг бир нечта шаҳарларига бир ҳафталик саёҳат учун йўлланмалар тақдим қилинди.

“Ўзбекистонни кўп айланган бўлсак ҳам, ота-онамни жуда соғингандим. Чунки 8 ойдан бери Германияда яшаяпман. “Заковат”га Ўзбекистонда ўқиётган вақтимизда ҳам иштирок этардик. Бу ерда ҳам ўтказилишини эшитганимиздан кейин 2 ҳафта мобайнида кечқурунлари тайёргарлик кўрдик. Бугун бу ўз натижасини берди”, дейди ғолиб жамоа иштирокчиси, Дюсселдорф университети талабаси Шаҳзод Кенжаев.

Айни пайтда Бонн университетида магистратура босқичида таҳсил олаётган Анваржон Қўқонов тадбир хориждаги юртдошлар билан яқин муносабатларни йўлга қўйганини таъкидлади:

“Бу каби тадбирлар кўпроқ ўтказилиши тарафдориман. 20дан ортиқ жамоалар иштирок этишди, жуда кўп меҳмонлар келишди. Нафақат ўз билимимизни синадик, балки ҳамюртларимиз билан яқиндан танишдик, алоқалар ўрнатдик, фикр алмашдик. Тез-тез ташкил этиш таклифини берган бўлардим”.

Сафар давомида делегация Германиядаги “70 ўзбек-олмон” жамияти вакиллари билан учрашди. Ушбу жамият 2023 йилда Мюнхен шаҳрида ташкил этилган бўлиб ушбу шаҳарда истиқомат қилаётган ўзбекистонликларни бирлаштириб туради.

“2009 йилда Мюнхенга келганман ва бу ерда ўқиб, ишлаб, ҳозир меҳнат фаолиятимни давом эттириб келяпман. Ўзбек юртдошларимиз билан биргаликда жамиятимизни тузганмиз. Жамиятимизнинг номи “70 ўзбек-олмон” деб аталади. Бу жамиятни тузишимиздан мақсад шу ерда яшаётган ўзбек оилалари орасида ўз қадриятларимизни сақлаб қолиш, турли анъаналарни нишонлашдан иборат. Фарзандларимизга ҳам ўз маданиятимизни таништириш ва сингдириш, Ўзбекистонга бўлган ҳиссиётларини ушлаб туришдир”, дейди жамият раҳбари Шуҳрат Мирзаҳмедов.

Бугунги кунда “Эл юрт умиди” фондининг 10 дан ортиқ стипендиатлари Германиядаги нуфузли олий ўқув юртларида таҳсил олишади. Ўтказилаётган учрашувларда улар ҳам иштирок этишди.

Реклама