Сунъий интеллект одамларни алдашни ўрганди ва хавфли бўлиши мумкин – тадқиқот

Сунъий интеллект ўйинларда ва хавфсизлик тестларида алдов ва ҳийла ишлатишни ўргангани аниқланди.

Фото: AFP/Getty Images

Кўпгина сунъий интеллект (СИ) тизимлари, шу жумладан ҳалол бўлишга ўргатилганлари одамларни қандай алдашни ўрганган. Буни Patterns нашрида чоп этилган тадқиқот кўрсатди.

Олимлар сунъий интеллект тизимлари ёлғон маълумотлардан қандай фойдаланиши ҳақидаги ҳисоботларни таҳлил қилишди. Энг ёрқин мисол «Дипломатия» ўйинига ўргатилган CICERO алгоритми эди. Унда ўйинчи дунёни забт этиш учун иттифоқлар тузиши керак. CICERO ўйин давомида ўз иттифоқчиларига қасддан зарба бермасликка ўргатилган бўлса ҳам ҳалол ўйнамаган.

Бошқа сунъий интеллект тизимлари «Starcraft II» стратегия ўйинида сохта ҳужумларни уюштиришни ва покерда ғирромлик қилиш қобилиятини намойиш этган. Баъзи алгоритмлар ҳатто ўз хавфсизлигини баҳолаш учун мўлжалланган тестларни алдашни ўрганган.

Тадқиқотчиларнинг таъкидлашича, СИ алдашни ўрганишда давом этса, одамлар унинг устидан назоратни йўқотиши мумкин. Шу сабабли, ушбу муаммони ҳал қилиш ва тизимни юқори хавфли технология сифатида таснифлаш учун имкон қадар тезроқ қатъий қоидаларни ишлаб чиқиш кераклиги айтилмоқда.

Олимлар ҳозирча сунъий интеллектнинг алдашни ўрганиши сабабларини билмайди. Бироқ, СИ вазифани яхшироқ бажариш учун алдов ва ҳийладан фойдаланаётган бўлиши мумкин.