Қозоғистон 2024 йил суғориш даврида Ўзбекистондан 922 млн куб метр сув олади

Давлатлараро мувофиқлаштирувчи сув хўжалиги комиссиясининг 86-йиғилиши бўлиб ўтди. Унинг таркибига Ўзбекистон, Қозоғистон, Қирғизистон, Тожикистон ва Туркманистон киради.

Фото: Kun.uz

Учрашув якунлари бўйича суғориш мавсумида «Дўстлик» давлатлараро канали орқали оқиб ўтадиган 922 миллион куб метр сувни Қозоғистонга етказиб бериш бўйича келишувга эришилди.

Шу билан бирга, Туркистон вилоятидаги Шардара сув омборида 4,8 миллиард куб метр сув тўпланган. Қозоғистон жанубидаги далаларни суғоришда фойдаланиладиган Тўқтўғул сув омборида (Қирғизистон) 8 миллиард куб метр сув йиғилди.

Шунингдек, йиғилишда Норин-Сирдарё каскади сув омборларини жорий йилнинг 30 сентябрига қадар фойдаланишнинг прогноз жадвали тасдиқланди.

Йиғилиш иштирокчилари Қозоғистон йил бошидан буён раислик қилаётган Оролни қутқариш халқаро жамғармаси доирасидаги ишларни алоҳида муҳокама қилди. Мамлакатда барча ташкилий ишлар аллақачон якунланган.

«Марказий Осиё мамлакатлари ўртасида сув-энергетика соҳасидаги ҳамкорлик механизмини яратиш тўғрисида»ги шартнома лойиҳаси ҳам ишлаб чиқилмоқда.

«Ҳозирги биринчи вазифамиз - тошқинлардан пайдо бўлган сувни йиғиш. Биз уни Каспий денгизи, Балхаш, Қамиш-Самар кўлларига, Улитов вилоятидан Қизилўрда вилояти кўлларига ва ҳоказоларга жўнатамиз. Лекин, шу билан бирга, жанубий вилоятларни ҳам сув билан таъминлаш муҳим. Бу масалада эса сув дипломатияси жуда муҳим», - деди Қозоғистон Республикаси сув хўжалиги ва ирригация вазири Нуржан Нуржигитов.

Сув хўжалиги комиссиясининг навбатдаги йиғилиши жорий йилнинг сентябр ойида Туркманистонда бўлиб ўтади.