Ўзбекистонда спорт соҳасидаги коррупциявий қилмишлар учун жиноий жавобгарлик белгиланади

Сенат ялпи мажлисида “Спорт соҳасида коррупциянинг олдини олиш мақсадида Ўзбекистон Республикасининг Жиноят кодексига қўшимчалар киритиш тўғрисида”ги қонун муҳокама қилинди.

Маълум қилинишича, кейинги йилларда мамлакатда спортни оммалаштириш, спорт турларини янада ривожлантириш ва спорт инфратузилмасини модернизация қилиш бўйича кенг кўламли ислоҳотлар амалга оширилмоқда. Шу билан бирга ҳозирги вақтда мазкур соҳадаги қонун ҳужжатларига спортдаги коррупциянинг олдини олиш ва унга қарши курашишга қаратилган янги нормаларни киритиш зарурати юзага келмоқда.

Қонун билан Жиноят кодексига спорт мусобақалари иштирокчилари ва ташкилотчиларининг қонунга хилоф равишда моддий қимматликлар олиши ёки мулкий манфаатдор бўлиши билан боғлиқ қилмиш учун жавобгарлик белгиланиб, 2141-модда киритилмоқда. Шунингдек, спорт мусобақалари иштирокчилари ва ташкилотчиларини пора эвазига оғдириб олганлик учун янги киритилган 2142-моддага асосан жавобгарлик назарда тутилмоқда.

Бундан ташқари, агар моддий қимматликлар берган ёки мулкий манфаатдор этган шахсга нисбатан моддий қимматликлар ёки мулкий манфаат сўраб товламачилик қилинган бўлса ва ушбу шахс жиноий ҳаракатлар содир этилганидан кейин бу ҳақда ўттиз сутка ичида ўз ихтиёри билан арз қилса, чин кўнгилдан пушаймон бўлса ва жиноятни очишда фаол ёрдам берган бўлса, у жавобгарликдан озод этилади.

Қайд этилишича, мазкур Қонунни ишлаб чиқиш жараёнида БМТнинг 2003 йилдаги “Коррупцияга қарши конвенцияси”, Европа Кенгашининг 2015 йилдаги “Спорт мусобақаларини манипуляция қилиш бўйича Конвенцияси”, Озарбойжон, Беларус, Грузия, Россия каби давлатларнинг қонунчилиги ўрганилган.

Қонун сенаторлар томонидан бир овоздан маъқулланди.