IW: ЕИдан чиқиш Германия учун 690 млрд евролик йўқотишларга олиб келади

2029 йилга бориб, Dexit ҳолатида Германия ЯИМ мамлакатнинг Европа Иттифоқи умумий бозорига қарамлиги туфайли 5,6 фоизга қисқаради, дея тахмин қилмоқда Кёлндаги Германия иқтисодиёти институти экспертлари.

Фото: Imago/PEMAX

Кёлндаги Германия иқтисодиёти институти (IW) томонидан 19 май, якшанба куни эълон қилинган тадқиқотга кўра, Германиянинг Европа Иттифоқидан чиқиши – Dexit – мамлакатда атиги беш йил ичида 2,5 миллион иш жойини йўқотилиши ва ЯИМ 5,6 фоизга пасайишига олиб келиши мумкин.

Таҳлилчиларнинг фикрича, агар мамлакат 2029 йилгача ЕИдан чиқса, жами 690 миллиард евро йўқотади. Бунинг сабаби Германиянинг Европа Иттифоқидаги ҳамкорлар билан савдога боғлиқлигидир. Германиянинг Dexit доирасидаги иқтисодий ишлаб чиқариш йўқотишлари 2020 йилдан 2023 йилгача бўлган даврда энергия харажатлари кескин ўсиши туфайли коронавирус пандемияси давридагига ўхшаш бўлади, дея огоҳлантиради тадқиқот муаллифлари.

Шунинг учун Brexit «тақлид қилишга арзийдиган ташаббус эмас», деб огоҳлантиради IW бошқарувчи директори Ҳубертус Бардт. Аксинча, Brexit - «Европа Иттифоқига аъзо бошқа давлатларга иқтисодий интеграциядан ўйламасдан воз кечиш ҳақида огоҳлантириш», деб таъкидлайди у.

ГуМ депутатлари Brexit’ни «Германия учун намуна» деб билади

2024 йил январ ойида Британиянинг Financial Times газетаси билан суҳбатда «Германия учун муқобил» (ГуМ) ўнг қанот популистик партияси раҳбари Алис Вайдел, агар Германия ҳукумати ГуМ томонидан бошқарилса, ЕИ ваколатларини чеклашга ҳаракат қилиши ҳамда Европа Иттифоқидан чиқиш бўйича референдум ўтказишга тайёр бўлишини айтди. У Германиянинг Европа Иттифоқидан чиқиши режасини тақдим этди, бу Британия Brexit’ига ўхшаш тарзда Dexit деб номланади.