Индонезияда беш метрлик бўғма илон аёлни бутунлай ютиб юборди 

Индонезия қишлоқларидан бирида беш метрли бўғма илон ўрмонда ўсимлик йиғаётган 45 ёшли аёлни ютиб юборди. Маҳаллий аҳоли ҳаддан ташқари тўйиб кетган илон ёнида аёлнинг кийимларини топиб олди. 

45 ёшли Фарида Жанубий Сулавеси провинциясида яшаган. 6 июн куни у ўрмондан уйга қайтмаган. Йўқолган аёлнинг эри унинг нарсаларини ўрмондан топиб олган, бу унга шубҳали туюлган. У хотинини қидириб топиш учун маҳаллий аҳоли ёрдамига таянган. 

Эртаси куни улар қорни катта бўлган илонни топган ва уни ёриб, аёл жасадини чиқариб олган. Қайд қилинишича, жасаддаги яраларга қараганда, илон дастлаб аёлнинг оёғига тишларини ботирган, сўнг унинг танасига ўралиб, бўғиб ўлдирган ва ютиб юборган. Марҳумнинг тўрт фарзанди қолгани айтилмоқда. 

Таъкидланишича, у 2017 йилдан бери Индонезияда бўғма илоннинг бешинчи қурбонидир. 

Тўрли бўғма илон дунёдаги энг катта илон бўлиб, узунлиги 7 метрга етиши мумкин. Фанга маълум бўлган энг узун бўғма илон 1912 йилда топилган ва 10 метрга етган. 

Тўрли бўғма илонлар Жануби-Шарқий Осиёда яшайди. Улар баъзан ҳатто очиқ денгизга ҳам сузади ва кечқурун ёки тунда ов қилади. Кундуз кунини дарахтлар ёки ғорларда ўтказади.