Қашқадарёда ўзганинг мобил иловасига уланиб, унинг картасидан пул ечиб олган шахс қўлга олинди

Самарқанд вилоятида яшовчи йигит қашқадарёлик аёлнинг банк мобил иловасига яширин равишда иккинчи фойдаланувчи сифатида уланиб олган. У аёлга тегишли банк картасидан пул маблағларини ечиб олиб, ўз эҳтиёжларига ишлатиб юборган.

Қашқадарёда ўзганинг банк мобил иловасига уланиб, унинг картасидан пул ечиб олган бола ушланди. Бу ҳақда ИИВ Киберхавфсизлик маркази хабар берди.

Маълум қилинишича, Қашқадарё вилоятида яшовчи фуқаро Х.М. ички ишлар органига ариза билан мурожаат қилиб, унинг банк картасидан 1 млн сўмга яқин пул маблағлари ечиб олинганини, айбдор шахсга қонуний чора кўришни сўраган.

Тезкор-қидирув хизмати Киберхавфсизлик бўлими ходимлари томонидан ўтказилган тезкор-қидирув тадбирлари натижасида, мазкур жиноятни Самарқанд вилоятида яшовчи М.М. содир этгани аниқланган.

Унга кўра, гумонланувчи М.М. сохта ҳавола юбориш орқали жабрланувчи аёлнинг шахсий маълумотларини қўлга киритган. Сўнгра унинг банк мобил иловасига иккинчи фойдаланувчи сифатида уланиб олган. Шу тариқа, М.М. аёлнинг 1 млн сўмга яқин пулини ўзининг фойдаланувида бўлган банк пластик картасига ўтказиб олган ҳамда эҳтиёжларига сарфлаб юборган.

Ҳолат юзасидан Н.А.га нисбатан Жиноят кодексининг 169-моддаси 3-қисми “б” банди (қонунга хилоф равишда ахборот тизимига кириб ёки ундан фойдаланиб ўғирлик содир этиш) билан жиноят иши қўзғатилган.

Аввалроқ Тошкентда сохта ҳавола орқали фуқароларнинг пулларини ўзлаштирган шахс қўлга олингани хабар қилинганди.