Жиззахда икки киши айиқ ҳужумидан ҳалок бўлгани ҳақидаги хабар рад этилди

Жиззах вилояти Зомин тумани ҳудудида айиқ икки нафар фуқаронинг умрига зомин бўлгани ҳамда айиқ овчилар томонидан ўлдирилгани ҳақида хабар тарқалди. 

Вилоят экология бошқармаси ушбу хабар ёлғонлигини билдирди. Маълум қилинишича, ижтимоий тармоқларда шов-шувларга сабаб бўлаётган ушбу ҳолат аслида Россиянинг Байкалорти ўлкасида содир бўлгани аниқланди. Бу ҳақида Амур вилоятининг Ҳайвонот дунёсини муҳофаза қилиш бошқармаси масъул ходимлари томонидан расмий муносабат билдирилган.

Жиззах вилояти Экология бошқармаси фуқаролардан бу каби нотўғри маълумотларга ишонмасликни сўради ва қонунчиликда ёлғон хабарлар тарқатган шахслар жавобгарликка тортилиши мумкинлигини эслатиб ўтди.