КХДР ҳарбийлари делегацияси раҳбари Москвада чўкиб кетди

Шимолий Корея ҳарбийлари делегацияси раҳбари Ким Кум Чеол Зеленограддаги анҳорда чўкиб кетган, деб ёзади Shot.

Фото: Ижтимоий тармоқлар

Эркак “Ангстрем” пляжига дам олиш учун борган, орадан бир неча соат ўтгач унинг ҳамкасблари тўполон кўтариб, полицияга мурожаат қилган. Чет эллик меҳмонни бир неча соат қидириб топа олишмаган. Эртаси куни КХДР фуқаросининг жасади сув юзига қалқиб чиққан.

Reutersʼнинг қайд этишича, вафот этган фуқаро Ким Ир Сен номидаги ҳарбий университетга раҳбарлик қилган. Ким Кум Чеол Москва ва Пёнгянг ўртасида умумқамровли стратегик ҳамкорлик тўғрисида шартнома имзоланганидан сўнг Россияга икки давлат ўртасидаги алмашинув доирасида келган элита делегацияга раҳбарлик қилган. Ташрифнинг бошқа тафсилотлари маълум қилинмаяпти.

Россия ва Шимолий Корея ўртасидаги муносабатлар июн ойида Путиннинг Пёнгянгга ташрифидан сўнг янги импулс олди. Ташрифдан сўнг, КХДР ўзининг инженерлик қўшинларини Украинанинг оккупация қилинган ҳудудларига “тикланиш ишлари”ни амалга ошириш учун жўнатишни режалаштираётгани маълум бўлган. Бу ҳақда Жанубий Корея радиоси маълум қилган.

19 июн куни Владимир Путин ва КХДР раҳбари Ким Жонг-Ун ҳарбий иттифоқчиликни билдирувчи стратегик шериклик тўғрисидаги шартномани имзолаган эди. Ҳужжатга кўра, Россия ва Шимолий Корея томонлардан бирига нисбатан агрессия рўй берганида бир-бирига ёрдам қилишади. Гарчи БМТ Хавфсизлик кенгашининг санкциялари билан тақиқланган бўлса-да, Путин КХДР билан ҳарбий-техник ҳамкорлик қилинишини ҳам инкор этмаган.