Ўзбекистонда "Ёшлар – келажак бунёдкорлари" III халқаро қурултойи ўтказилади

Қурултой 1000 нафарга яқин ўзбекистонлик ва хорижлик ёшларни ўз атрофида бирлаштиради.

Фото: ЎзА

Иорданиянинг Ammon News газетасида бўлажак "Ёшлар – келажак бунёдкорлари" III халқаро қурултойига бағишланган мақола эълон қилинди.

"Дунё" хабарига кўра, шу йилнинг 8–13 август кунлари Қашқадарё вилоятининг Шаҳрисабз туманида "Ёшлар - келажак бунёдкорлари" III халқаро қурултойи бўлиб ўтади.

"Қурултойнинг тантанали очилиш маросими 9 август Шаҳрисабзнинг Оқсарой мажмуасида ўтказилади. Шунингдек, иштирокчиларни турли танловлар, плоггинг мусобақалари, экологик ва туристик лойиҳалар, китобхонлик куни, миллий ва этноспорт мусобақалари, ёшлар учун бизнесни ташкил қилиш, маданий-кўнгилочар тадбирлар ва таниқли инсонлар билан учрашувлар кутмоқда", – деб ёзган Ammon News.

Иордания нашрида таъкидланганидек, қурултой 1000 нафарга яқин ўзбекистонлик ва хорижлик ёшларни ўз атрофида бирлаштиради. Мақсад ёшларнинг экология ва ижтимоий-иқтисодий соҳалардаги фаоллигини ошириш, уларни туризм соҳасига кенг жалб этиш, ёш авлоднинг экология ва туризм соҳасидаги истиқболли ғоялари ҳамда лойиҳаларини рўёбга чиқаришдир.