Швейцария Россиянинг музлатилган активларидан олинган даромадни Украинага бермайди

Мамлакат қонунлари ва халқаро мажбуриятлари Россия Марказий банки маблағларидан ҳар қандай махсус даромад олишга тўсқинлик қилади.

Фото: Keystone / Alessandro Della Valle

Швейцария, Европа Иттифоқи қарор қилганидек, Россиянинг музлатилган активларидан тушган даромадларни Украинага ўтказмайди. Бу ҳақда Иқтисодий масалалар бўйича давлат котибияти (Швейцария Иқтисодиёт вазирлигининг бўлими) журналистларига маълум қилди, деб ёзди Swissinfo.

Расмийларнинг таъкидлашича, Швейцария қонунлари ва халқаро мажбуриятлари Россия Марказий банки маблағларидан ҳар қандай махсус даромад олишга тўсқинлик қилади. Шу туфайли, Украинага бериладиган ҳеч нарса йўқ.

Қайд этилишича, жорий йилнинг апрел ойи ҳолатига кўра, Швейцария юрисдикциясида Россия Марказий банкининг 7 миллиард Швейцария франкидан сал кўпроқ миқдоридаги активлари музлатилган. Шу билан бирга, Россия Марказий банкининг маблағлари Россия билан боғлиқ бўлган жисмоний шахслар ва компанияларга тегишли музлатилган активлардан алоҳида сақланади.

26 июл куни Европа Иттифоқи Россиянинг музлатилган активларидан олинган дастлабки 1,5 миллиард евро даромадни Украинани қўллаб-қувватлаш учун юборди. Бу Европа Иттифоқи операторлари ва марказий қимматли қоғозлар депозитарийлари олган даромад, бир пайтлар россияликлар уларга ўз активларини жойлаштирган.

Украина бу маблағларни тўғридан-тўғри олмайди, улар Украинанинг ҳарбий салоҳиятини қўллаб-қувватлаш, шунингдек, мамлакатни қайта қуришни қўллаб-қувватлаш учун Европа тинчлик жамғармаси ва Украина жамғармаси орқали йўналтирилади.

Украина мудофаа вазири Рустем Умеров сўзларига кўра, ушбу схема бўйича Украина ҳар йили тахминан 2,5-3 миллиард евро олади.