Англияда пичоқ билан қилинган ҳужум оқибатида икки бола ҳалок бўлди

Мерсисайд полицияси бошлиғи Серена Кеннеди Англиянинг Саутпорт шаҳрида пичоқ билан қилинган ҳужум оқибатида икки бола ҳалок бўлган, яна 11 киши, жумладан, тўққиз бола жароҳатланганини айтди.

Кеннеди Шимоли-Ғарбий тез ёрдам хизмати ходими Дэйв Китчин ва Мерсисайд ёнғин-қутқарув хизмати бошлиғи Фил Гарриган билан қўшма матбуот анжумани ўтказди. 

Унинг сўзларига кўра, полиция рақс мактабида пичоқ билан қилинган ҳужум ҳақида маҳаллий вақт билан соат 11:47 да хабар олган. Кеннеди икки бола ҳалок бўлганини ва 9 бола яраланганини, улардан 6 нафари оғир аҳволда эканини эълон қилди. 

Кеннеди, шунингдек, икки ёши катта шахс ҳам оғир яраланганини ва бу одамлар болаларни ҳимоя қилмоқчи бўлган пайтда жароҳатланганини айтди. 

17 ёшли қотилликда гумонланувчининг ҳибсда эканлиги ва унинг сўроқлари давом этаётганига эътибор қаратган Кеннеди, гумонланувчи Ланкашир минтақасидаги Банкс шаҳридан экани, лекин асли Уэлс пойтахти Кардиффда туғилгани ҳақидаги маълумот билан ўртоқлашди. 

Полициянинг қўшимча қилишича, ҳужум қурбонлари Харт-стритдаги рақс мактабида америкалик қўшиқчи Тейлор Свифтнинг концептуал тадбирига ташриф буюрган болалардир. Унинг таъкидлашича, воқеа террорчилик ҳаракати сифатида баҳоланмайди. 

Ихтисослашган гуруҳлар ишга туширилди

Китчин, ўз навбатида, пичоқбозлик ҳақидаги кўплаб хабарлардан сўнг минтақага ихтисослашган гуруҳларга эга тез ёрдам машиналари жўнатилганини айтди. 

11 жабрланувчига воқеа жойида тиббий ёрдам кўрсатилди, барча жароҳатланганлар минтақа ва Манчестердаги шифохоналарга юборилди.

Гарриганнинг айтишича, воқеа жойига тиббиёт гуруҳлари жўнатилган ва воқеада бошқа жароҳатланганлар бор ёки йўқлигини аниқлаш устида иш олиб борилмоқда.

Воқеа жойида жамоалар зарур биринчи ёрдам кўрсатганини таъкидлар экан, Гарриган, айниқса, ўт ўчирувчилар ҳудудда яшагани учун воқеадан чуқур шокка тушганини айтди.

Саутпортда пичоқ билан қилинган ҳужум 

Ҳужумчи туш пайти Ливерпулдан 35 километр ва Манчестердан 70 километр узоқликдаги Саутпортда бир неча кишини, жумладан болаларни пичоқлаган, дея хабар берди полиция. 

Харт-стритдаги бинода содир бўлган воқеадан сўнг воқеа жойига полиция етиб келган ва қўлида пичоқ бўлган гумонланувчини ушлаган. 

Гувоҳларнинг айтишича, яраланганлар орасида болалар кўп ва воқеа америкалик қўшиқчи Тейлор Свифтга бағишланган тадбирда содир бўлган. 

Ҳужум ортидан ҳукуматнинг муносабатини ўз ичига олган баёнотлар берилди. Бош вазир Кир Стармер ўзининг баёнотида Саутпортдан келган хабар даҳшатли ва ҳайратланарли эканлигини айтди. 

Стармер воқеа жойига зудлик билан етиб келган полиция ва тиббиёт ходимларига миннатдорчилик билдирди ҳамда воқеалар ривожидан доимо хабардор бўлиб турганини таъкидлади.

Ички ишлар вазири Иветт Купер X ижтимоий тармоғидаги постида минтақадаги хавфсизлик кучлари билан алоқада эканини ва уларнинг ишини тўлиқ қўллаб-қувватлашини билдирди.