«СБУ» ҳарбий автомобилларга ўт қўйган шахслар ушланганини маълум қилди

Украина Хавфсизлик хизмати Миллий полиция билан биргаликда Одессада Украина мудофаа кучлари автомашиналарига ўт қўйиш ҳолатларини содир этган бир гуруҳ ёшларни қўлга олди. Бу ҳақда 30 июл, сешанба куни «СБУ» матбуот хизмати Telegram’да маълум қилди.

Аниқлик киритилишича, қўлга олинганлар 18 ёшдан 24 ёшгача бўлган олти нафар одессалик бўлиб, улар машҳур озиқ-овқат етказиб бериш хизматида курер бўлиб ишлаган. «СБУ» маълумотларига кўра, Россия «ФСБ» буйруғи асосида улар бир ҳафта ичида 15 дан ортиқ ҳарбий автомобилни йўқ қилишга уринган. 

Ўт қўювчиларнинг россиялик кураторлари

Бу шахслар Telegram-каналларининг фаол фойдаланувчилари сифатида осон пул излаб, ўз «резюмеларини» қолдирган ҳолда Россия разведка хизмати эътиборига тушган, дейилади «СБУ» пресс-релизида. 

«СБУ» фикрича, курерлик етказиб бериш ниқоби остида ишлаган айбланувчилар ўзларининг скутерларида шаҳар бўйлаб ҳаракатланишган ва у ерда Мудофаа кучлари машиналари учун тўхташ жойларини белгилашган. Кейин ҳужумчилар потенциал нишонларнинг фотосуратларини «тасдиқлаш» учун рус бошқарувчисига юборган. Ёшлар ўт қўйиш ҳолатларини «ҳисобот бериш мақсадида» суратга олишган.

Украина махсус хизмати баёнотида айтилишича, ўт қўйганлар «иссиқ изида» қўлга олинган. Улардан қўлбола ўт қўювчи аралашмалар ва жиноят аломатлари бўлган мобил телефонлар олиб қўйилди.

Украинада ҳарбийлар машиналарига ўт қўйилиши

Ёшларга нисбатан Украина Қуролли кучлари ва бошқа ҳарбий тузилмаларнинг қонуний фаолиятига тўсқинлик қилганлик учун жиноий иш қўзғатилган. Украина қонунларига кўра, улар 8 йилгача қамоқ жазосига ҳукм қилиниши мумкин.

10 июл куни «Важные истории» интернет нашри даркнетнинг рус тилидаги саҳифаларида ҳар бир қўпорувчилик учун 1500-2000 доллар тўлаш шарти билан Украина ҳарбий машиналарига ўт қўйиш буюртмалари эълон қилинганини ёзди.