Теҳронда ўлдирилган Ҳания, Ливанга берилган ракета зарбаси ва Венесуэладаги норозилик намойишлари — кун дайжести

Ўтган кун давомида жаҳонда рўй берган энг асосий воқеалар ва янгиликлар шарҳи билан кундалик хабарномамизда таништиришда давом этамиз.

Ғазодаги вазият

Теҳронда ҲАМАС сиёсий бюроси раҳбари Исмоил Ҳания ўлдирилди. Ҳания Эрон пойтахтидаги қароргоҳига уюштирилган зарба натижасида ҳалок бўлган, деб хабар бермоқда Эроннинг Mehr агентлиги Ислом инқилоби муҳофизлари корпуси баёнотига таяниб.

Агентлик маълумотларига кўра, ҳужумда Ҳаниянинг қўриқчиларидан бири ҳам ҳаётдан кўз юмган. ҲАМАС ҳаракати расмий баёнотда сиёсий бюро раҳбарининг ўлимини тан олди.

Бир кун аввал ҲАМАС сиёсий бюроси раҳбари Исмоил Ҳания дунёнинг барча давлатларини, айниқса исломий ва араб мамлакатларини 3 август куни Фаластин халқини қўллаб-қувватлаб норозилик акциясида қатнашишга чақирган эди.

БМТнинг фаластинлик қочқинларга кўмаклашиш ва ишларни ташкил қилиш бўйича Яқин Шарқдаги агентлиги Исроил Ғазода ҳарбий операция бошлаганидан буён гепатит билан касалланишнинг қарийб 40 минг ҳолати аниқланганини таъкидламоқда.

UNRWA ўзининг баёнотида агентликнинг бутун Ғазо секторидаги тиббиёт марказлари ва бошпаналарида 800 дан 1000 нафаргача гепатит юқтирганлик билан боғлиқ янги ҳолатлар қайд этилаётганини айтган. Агентлик оғир санитар шароитлар ушбу хавфли сариқ касалликнинг тарқалишига ёрдам бераётгани, болалар ўртасида айниқса гепатитнинг А тури кенг тарқалаётганини таъкидлаган.

Ғазода Исроил агрессияси қурбонлари 39 минг 400 кишига етди. Сўнгги бир сутка ичида яна 37 киши ўлдирилган, 73 киши ярадор қилингани хабар қилинмоқда.

Жумладан, Ғазо секторининг марказида жойлашган Бурайж қочқинлар лагери Исроил самолётлари томонидан бомбардимон қилиниши натижасида 21 фаластинлик ҳалок бўлган, деб хабар беради Фаластиннинг WAFA ахборот агентлиги.

Ливанга берилган зарба

Исроил армияси Ливан пойтахти Байрутга 2006 йилдан буён илк марта ҳужум қилди. ЦАҲАЛнинг хабар қилишича, мўлжал Жўлан тепаликларидаги Мажд уш-Шамс шаҳарчасида болаларнинг ўлимига сабабчи бўлган “Ҳизбуллоҳ” қўмондонларидан бири, Ҳожи Муҳсин номи билан танилган, Ҳасан Насруллоҳнинг катта маслаҳатчиси Фуад Шукур бўлган.

Эроннинг Tasnim агентлиги Ливандаги манбаларига таяниб, Исроил ўз мақсадига эриша олмагани, Фуад Шукур тириклигини таъкидламоқда.

ЦАҲАЛ уни “Ҳизбуллоҳ” учун юқори аниқликдаги ракеталар яратиш лойиҳасининг раҳбари деб атамоқда. ТАСС агентлигининг манбаларга таяниб хаба беришича, зарба натижасида “Ҳизбуллоҳ” гуруҳининг икки қўмондони ўлдирилган бўлиши мумкин.

Шунингдек, “Ҳизбуллоҳ”нинг Байрут остонасидаги таянч пункти ҳам яксон қилингани айтилмоқда.

Исроил томонидан назорат қилинадиган Жўлан тепаликларидаги Мажд уш-Шамс шаҳарчаси Ливан томонидан 27 июл куни ракета зарбасига дучор бўлган эди. Снаряд болалар майдончаси ёнидаги футбол майдонига келиб тушган. 12 киши ҳалок бўлган ва уларнинг 10 нафари 10 ёшдан 16 ёшгача бўлган болалар бўлган. Яна 19 киши ярадор бўлган.

ЦАҲАЛ оператив тизимлари ракета Ливан жанубидаги Шебаа қишлоғининг шимолий қисмидан учирилганини айтган. ЦАҲАЛ спикери, контр-адмирал Даниэл Ҳагари снаряд Эронда ишлаб чиқарилган, 50 кг жанговар каллакка эга бўлган Falaq-1 ракетаси эканини айтган. Унинг сўзларига кўра, бундай ракеталардан Теҳрон томонидан қўллаб келинаётган шиаларнинг “Ҳизбуллоҳ” гуруҳи мунтазам фойдаланади.

Венесуэладаги оммавий намойишлар

Николас Мадуро яна ўзини президент деб эълон қилди, мухолифат ҳам сайловларда ғалаба қозонганини даъво қилмоқда. Пойтахт Каракас ва бошқа шаҳарларда норозилик намойишлари полиция билан тўқнашувларга айланмоқда. Қўшни давлатлар сайлов натижаларини қайта кўриб чиқишга чақирмоқда.

Николас Мадуронинг ғалабасини эълон қилган президентлик сайловларидан кейин мухолифатчиларнинг минглаб тарафдорлари кўчаларга чиқди. Венесуэладаги ижтимоий зиддиятларни кузатиш бошқармаси маълумотларига кўра, 20 та штатда 187 та норозилик акцияси қайд этилган.

Reuters ва BBC рус хизмати маълумотига кўра, акциялар 29 июл куни кечқурун бошланган. Аввалига бутун мамлакат бўйлаб «касероласо» (бўш кастрюлкалар марши) деб ном олган намойишлар бўлиб ўтган — унинг иштирокчилари кастрюлка ва товаларни бир-бирига уриб, президент Мадуро ўзини ғолиб деб эълон қилганига норозилик билдиришган. Шундан кейин кўча намойишлари полициячилар билан тўқнашувларга айланиб кетган.

Каракасда минглаб намойишчилар шаҳар маркази бўйлаб марш уюштиришган. Мадуронинг деворлар ва устунларга ёпиштирилган портретларини, ғилдираклар, чиқинди ва машиналарни ёқишган. Коро шаҳрида акция иштирокчилари собиқ президент — Мадуронинг устози Уго Чавеснинг ҳайкалини ағдаришган.

Пойтахтда полиция ва ҳарбийлар намойишчиларга қарши кўздан ёш сиздирувчи газ ва резина ўқлардан фойдаланган. Бунга жавобан айрим намойишчилар уларга қарата тош, ёнувчан модда солинган бутилкалар ва бошқа турли буюмлар улоқтиришган.

Намойишчилардан камида икки киши ўлдирилгани маълум қилинмоқда. Улардан бири 30 июлга ўтар кечаси чегарадаги Тачира штатида, бошқаси — душанба куни Венесуэла шимолидаги Маракай шаҳрида. Яракуй штатида бир киши ҳалок бўлгани ҳамда 46 киши қўлга олингани ҳақида хабар тарқалган. Венесуэла мудофаа вазири Владимир Падрино Лопес тартибсизликлар чоғида 23 нафар ҳарбий хизматчи яралангани, жумладан, ўқотар қуролдан жароҳат олганлар борлигини маълум қилган.

Николас Мадуро телевидение орқали махсус мурожаатида намойишларга муносабат билдирган. У Венесуэлада «яна бир марта фашистик ва аксилинқилобий характердаги давлат тўнтаришига уриниш бўлаётгани»ни айтган. «Бизни ҳеч қачон нафрат жойимиздан қўзғата олмаган. Аксинча, биз доимо кучлилар қурбони бўлганмиз», — дея унинг сўзларини келтирган Associated Press.

Венесуэлада 2018 йилда ўтказилган аввалги президентлик сайловларидан кейин ҳам бир неча ой давомида намойишлар бўлиб ўтган, аммо Мадуро ва унинг бошчилигидаги Ягона социалистик партия ўз ҳокимиятини сақлаб қолганди. Мадуро 2013 йилдан буён президентлик қилиб келади. Янги президентлик муддати унинг учун учинчисидир.

Туркияда кўчадаги итларга оид қонун

Туркияда уйсиз ҳайвонлар тўғрисида қонун лойиҳаси қабул қилинди.

Қонунга кўра, кўчадаги қаровсиз ҳайвонларни ўлдириш тақиқланади. Бироқ васийликка олинган ҳайвонлар агар тузалмас касалликка дучор бўлган бўлса ёки хавфли юқимли касалликлар ташувчиси бўлса, ветеринарнинг қарорига кўра эвтаназияга тортилиши мумкин.

Туркия парламенти — Буюк миллий мажлис томонидан қабул қилинган ва тасдиқланган қонунга мувофиқ, барча уйсиз итлар йиғилиб, ҳайвонлар учун бошпанага келтирилади. Бу ерга тўпланган ҳайвонлар бепушт қилиниб, боқилади.

Шунингдек, ўз уй ҳайвонларини кўчада қолдириб кетган одамлар 60 минг турк лираси миқдорида жаримага тортилиши ҳам белгиланди.

Ҳужжатга кўра, қонун бандларини бажармайдиган ва кўчалардан дайди итларни йиғиштириб олмайдиган маҳаллий ҳокимлар 6 ойдан 2 йилгача озодликдан маҳрум этилади.

Шунингдек, ит ва мушук сақловчилар 2025 йилга қадар ўз қарамоғидаги уй ҳайвонларини рақамли идентификатордан рўйхатдан ўтказишлари керак бўлади.

Россияда мигрантларга ҳужум ҳосиласи

Россияда мигрантларни ушлаб мамлакатдан чиқариб юборишнинг оқибатлари кўзга ташлана бошлади. Рибинск, Ярославл, Ковров, Владимир ва Олтин ҳалқа деб аталмиш ҳудуд ичидаги бошқа шаҳарларда “Пятёрочка” ва “Перекрёсток” озиқ-овқат дўконлари пештахталаридан маҳсулотлар йўқола бошлаган.

Йўқ, уларни кимдир ўғирлаб кетаётгани йўқ. Шунчаки ўтган ҳафтада бир қатор шаҳарларда мигрантларга қарши рейдлар ўтказилгани оқибатида, маҳсулотни саралаб дўконларга етказиб берадиган ва жойлаштирадиган одамлар қолмаган.

Ижтимоий тармоқларга одамлар дўконларнинг бўм-бўш пештахталари суратларини жойлаштиришмоқда. Қайд қилинишича, дўконлардан нон, турли ёрмалар, ун, зираворлар, исимлик сув каби биринчи навбатда керакли маҳсулотлар йўқ бўлиб қолган.

«Бу ерда мигрантлар ишлашарди, рейдлар давомида уларни ушлаб, ватанларига чиқариб юборишди», — деб ёзмоқда Газета.Ru Ярославлдаги тақсимот марказида ишчи кучи етишмаётганини қайд этиб. “Ивановские новости” ҳудуди инфопортали эса сўнгги рейдларда барча нолегал мигрантлар ушланиб, депортация қилинганини таъкидлаган.

“Пятёрочка” савдо тармоғига эгалик қилувчи X5 Group'нинг хабар беришича, етказиб беришдаги узилишлар тақсимот марказидаги ишчи кучи етишмовчилиги билан боғлиқ. Компания қўшни ҳудудлардан қўшимча ишчи кучларини жалб қилиб, муаммони ечишга ҳаракат қилишини айтган.

“Крокус Сити Ҳолл”да террорчилик акти рўй бергач, Марказий Осиё республикаларидан борган меҳнат мигрантлари Россияда қийинчиликларга дуч кела бошлашган.

Бу сизга етказмоқчи бўлган хабар ва янгиликларимизнинг сўнггиси эди. Эртага кўришгунча.