«Ҳаммаси Париж аэропортида бошланди...» – Кападзе Олимпиадагача йўл, муаммолар, истеъфо ва таътилга чиқиши ҳақида

Бугун, 5 август куни ЎФА мажлислар залида Ўзбекистон U-23 жамоаси бош мураббийи Темур Кападзе иштирокида матбуот анжумани бўлиб ўтди. Журналистлар билан савол-жавоб давомида мураббий «Олимпик» лойиҳаси, олимпиячиларнинг Париж-2024даги илк иштироки, омадсизлик сабаблари, легионерлар танлови, Испания ҳамда Мисрга қарши ўйинлар ҳақида фикрларини билдирди. Тадбир якунида эса «Олимпик» ва олимпия жамоасидан истеъфога чиққанини маълум қилди.

Про лигадан Олимпиадагача бўлган 3,5 йиллик давр ҳақида

Темур Кападзе матбуот анжумани бошида Олимпиадагача бўлган 3,5 йил ичида босиб ўтилган йўл ҳақида гапирди.

— Олимпиадагача бўлган 3,5 йил ичида узоқ йўлни босиб ўтдик. Раҳбарият олдимизга Париж-2024 олимпиадасига чиқишдек катта ва юқори мақсадни қўйганди. Ўтган йиллар давомида кўплаб ёшларга футболда ўз ўрнини топишига хизмат қилдик, «Олимпик»дан миллий жамоаларга чақирувлар олишди.

Жамоамиз илк мавсумданоқ нималарга қодирлигини кўрсата олди. Про лигадан Суперлигага йўл олиш уддаланди ва жамоа шу даврга қадар барқарор ўйин кўрсатиб келмоқда. Умуман олганда, 4 та йирик мусобақада иштирок этдик. Мухлисларимиз ишончини оқлашга ҳаракат қилдик. Худога шукр, юзимиз ёруғ бўлди. Энг асосий вазифа — Олимпиада йўлланмасини қўлга киритдик. Қолган турнирларда ҳам муносиб иштирок эта олдик, деб ўйлайман.

Шу пайтгача бизни қўллаб-қувватлаган раҳбариятга, мухлисларимизга ва барчангизга раҳмат айтаман. Футболимизни янги босқичга олиб чиқиш йўлида бор имкониятимизни ишга солдик. Энди бу тарих.

«Легионерлар келганида – биз кутган даражада эмасди»

Кападзе Осиё кубоги U23дан кейин Олимпиадага тайёргарлик кўриш учун жуда вақт кам қолгани ва легионерларнинг ҳолати ҳақида гапирди.

— Олимпиадага келадиган бўлсак, Осиё кубогидан кейин олдимизда кўп вақт қолмаганди. Аввало Олимпиадага йўл олишдаги юк билан биз 3,5 йил ҳаракат қилдик, бунинг қувончи албатта бор эди. Жамоамиз билан турли интервюлар, тадбирлар, хурсандчиликлар, чарчоқ аломатлари. Кўп легионерларимизда чемпионатлар тугаганди, кимлардадир чарчоқ сезилди, баъзилар жамоа алмаштирди.

Балки олдимизда кўпроқ вақт бўлганда бошқача бўлармиди... Айтайлик, Олимпиада ҳеч бўлмаса, 5 ойдан кейинроқ бўлганида натижамиз бошқача бўлиши мумкин эди. Чунки ўзимиз ҳам хурсандчиликлардан бироз босилардик.

Тайёргарликка келсак, айтганимдек, вақтимиз кўп эмасди. Таркиб шакллантиришда ўзига яраша қийинчиликлар бўлди. Дукентда ҳам легионерларсиз тайёргарлик кўришга тўғри келди. Бу борада камчиликлар кўп бўлди.

Ёши катта футболчиларимизнинг иқтидори, кучини ҳаммамиз яхши биламиз. Футболчилар бундан кўпроғига қодир эди. Уларга миннатдорчилик билдираман. Улар учун ҳам, биз учун ҳам фойдали бўлди. Бу — жамоавий ўйин. Энг асосийси — биз барча учрашувда ғалаба қозонсак бўларди, қаердадир омад етишмади.

Танлов борасида Элдор, Остонни аниқлаб олгандик. Ўрта позицияни кучайтириш учун Акмал Мозговойни номзод сифатида кўргандик, аммо Алибек Давроновнинг жароҳати жиддий экани сабабли ҳимоячи Ҳусниддин Алиқулов вариантига тўхталдик. Бу легионерлар сафимизга қўшилганида биз истаган, кутган даражадаги спорт формасида эмасди. Шунга қарамай, қисқа фурсатда уларни аввалги спорт формасига қайтаришга уриндик.

Аэропортдан бошланган ташкилий муаммолар ҳақида

Темур Кападзе Ўзбекистон олимпия жамоасининг Францияга етиб борганидан кейин дуч келган муаммолари ҳақида ҳам «ёрилди».

— Ўзи ҳаммаси Париж аэропортига қўнишимиз билан бошланди. Футболчиларимизнинг иккита багажи йўқолди ва шу билан бир ҳафтадан кейин топилди. Ундан кейин аэропортдан шаҳардаги манзилимизга етиб боргунча адашиб кетдик, автобусда 40 дақиқа қолиб кетдик. Ҳайдовчиларга аниқ кўрсатмалар берилмаганидан бўлса керак.

Делегациянинг олимпия шаҳарчасига жойлашиб олишида ҳам муаммолар бўлди. У ерга ҳаммамизни ҳам киритишмади. Испания, Исроил ва Мали жамоалари билан битта жойда эдик. Уларда шароитлар бор, бизда эса аксариятимизда иссиқ пайтда ҳам кондиционер ишламади, мезбонлар тўғрилаймиз дегани билан, тўғрилаб беришмади. Кейин эса сув муаммоси чиқди, сув керак эди, тополмадик. Биринчи кундан шунақа ташкилий муаммолар билан овора бўлиб юрдик.

Кейинги кундан эса оддий машғулотга боришда автобуслар бўйича муаммолар бўлди. Овқат масаласини-ку, гапирмайман. Ишқилиб, ҳар куни шунақа можароларга ўралашиб қолдик.

Испания ва Мисрга қарши ўйинлар, қийинчиликлар ва тақвим ҳақида

Темур Кападзе Ўзбекистон олимпия жамоасининг дебют баҳсда Испанияга қарши муносиб ўйин ўтказгани ва Мисрдан учралган мағлубият ҳамда омадсизлик сабабларига тўхталди.

— Турнирда энг аввало бизга омад етишмади. Омад кулиб боққанда биз ҳали ҳам мусобақада қатнашаётган бўлардик. 1-турдан олдин Испаниянинг охирги ўйинларини таҳлил қилдик. Албатта, ўзига яраша камчиликларимиз ҳам бўлди. Ўйинга қўйган стратегиямиз яхши ишлади, айниқса, биринчи бўлимда. Лекин иккинчи бўлимда Испанияга имконият бердик.

Уларга қарши тўғри прессинг қилиб, имкониятларга эга бўлдик. Бу ўйиндан кейин жамоа билан рақибларнинг ва ўзимизнинг ўйинимизни таҳлил қилдик. Биз ўша куни рақибдан кучсиз эмасдик, энг камида дуранг қайд этишимиз мумкин эди. Умуман олганда, бундан кўпроғини кутгандик, бироқ бизга омад етишмади. Энг муҳими катта тажрибага эга бўлдик.

Бу баҳсдан кейин тикланиш ўрнига биз бошқа шаҳарга сафар қилдик ва вақтимиз йўлда ўтди. Миср билан ўйингача ташкилий муаммолар сабаб кўп нарсага улгурмадик. Миср эса Нантда шароитлари зўр, беш юлдузли меҳмонхонага жойлашган, тикланиш учун яхши шароит, овқатланиш масаласида муаммоси йўқ. Улар биз ўрганган шароитда эди. Биз эса Олимпиадага биринчи бор борганимиз учун Олимпия шаҳарчасида жуда кўп муаммоларга дуч келдик. У ерда футболни ўйламай, бошқа муаммолар билан чалғиб келдик. Ҳар уч кунда ўйин, тикланиш керак бўлган пайтда йўлда бўлардик.

Биринчи ўйинда кўп куч йўқотгандик. Миср эса қарши ҳужумларда бизга муаммо туғдирди. Улар зич ҳимояланишди, лекин етарлича имкониятларимиз бўлди. Тақвим? Дастлабки ўйин кўп нарсага ойдинлик киритади. Биринчи ўйинда ютсангиз, кейингиларида босим бўлмайди. Бироқ тақвим бизга боғлиқ бўлмаган ҳолат эди. Рақибларимиз ҳам ўзига ярша кучли. Бу мусобақада кучсиз жамоа йўқ эди. Устига-устак Иброҳимхалил Йўлдошев фарзандининг бетоблиги учун ортга қайтишга мажбур бўлди. У бу муаммосини эртароқ айтганида, балки биз имкон қадар ёрдам бериб, уни таркибда қолдирган бўлардик.

Албатта, бундан кўпроғини амалга ошира олардик. Ўйинларда етарлича вазият яратдик. Қаердадир босим халақит берди.

«Таътилга чиқаман» — Кападзе «Олимпик» ва олимпия жамоасидан истеъфога чиқди

Темур Кападзе матбуот анжумани якунида «Олимпик» ва олимпия жамоасидан истеъфога чиқиши ва йил охиригача таътилга чиқишини айтди.

— Таътилга чиқмоқчиман. 3,5 йилдан бери дам олиш нима эканини билмадим. Бу вақт давомида олимпия жамоаси билан 4 та катта мусобақада иштирок этдик. «Олимпик» билан ҳам Суперлигада барқарор иштирок этиб келдик. Умуман олганда, деярли бўш вақтим бўлмади. Лекин бундан нолимайман. Асосий вазифани бажардик. Олимпиадада иштирок этдик. Лойиҳадаги миссиям тугади. Энди йил охиригача дам олмоқчиман.

«Олимпик»нинг келажаги нима бўлишини билмайман. Буни раҳбарият ҳал қилади. Ҳозирча ёрдамчи мураббийлар бошқаришади. Ўзимга келсак, таътилдан сўнг нима қилишимни ўйлаб кўраман.