Австралияда жамоатчилик норозилиги туфайли электросамокатлар ижараси тақиқланди

Австралиянинг Мелбурн шаҳрида электросамокатлар ижараси «хавфсизлик учун йўл қўйиб бўлмайдиган таваккалчилик туғдириши» боис тақиқланди, деб хабар беради BBC.

Шаҳар кенгаши илк бор 2022 йил февралда электросамокатлардан икки йил давомида тест режимида фойдаланишга рухсат берганди, бироқ ҳозирга келиб кенгашнинг позицияси кескин ўзгарди. Ўтган давр ичида самокатлар билан боғлиқ юзлаб авариялар қайд этилган бўлиб, бу жамоатчиликнинг норозилигига сабаб бўлди.

Мелбурн мэрининг маълум қилишича, у айрим электросамокат фойдаланувчиларининг номақбул ҳаракатларидан «тўйган». «Пиёдалар йўлакларидан жуда кўп юришади. Одамлар уни белгиланганидек парковка қилмайди, шаҳар бўйлаб худди чиқинди каби ёйилиб кетган. Мелбурн — қисқа муддат фойдаланишдан кейин 26 километр/соат тезликка эриша оладиган скутерларни ижарага олишни тақиқлаган дунёдаги охирги шаҳардир. Франция пойтахти Париж уларни ўтган йилнинг сентябрида тақиқлаганди», — дейди шаҳар мэри Николас Рис.

13 август куни шаҳар кенгаши аъзолари электросамокатларни зудлик билан тақиқлаш бўйича қарор қабул қилди. Lime ва Neuron операторларига ўз электросамокатларини 30 кун ичида олиб ташлаш мажбурияти юкланди. Компанияларнинг шу турдаги транспорт воситаларидан фойдаланиш бўйича яна олти ойлик шартномаси мавжуд эди ва охирги ҳафтада улар фойдаланувчиларни кенгашга петиция киритишга чақириш бўйича фаол кампания олиб борди.

Иккала компания ҳам сўнгги ойларда хавфсизликни таъминлаш ва самокатлардан фойдаланиш қоидаларини кучайтиришга катта маблағ йўналтирди. Хусусан, Neuron самокатларга мақсадли бўлмаган фойдаланишларнинг олдини олиш учун сунъий интеллектга эга камералар ўрнатиш режасини маълум қилди.

Компания вакили шаҳар кенгашининг бутунлай тақиқлаш тўғрисидаги қарорини қоралаб, амалдорлар билан самокатлардан фойдаланишни чеклаш бўйича музокаралар олиб борилаётганини билдирди.

Мелбурнда 2022 йил февралида бошланган тажриба доирасида Lime ва Neuron’нинг 1,5 мингга яқин самокатлари турли жойларга тарқатилган. Аввалроқ шаҳар кенгаши самокатлар атмосферага чиқариладиган зарарли газларни 400 тоннадан ортиққа камайтиргани ва жамоат транспортидан фаолроқ фойдаланишга хизмат қилганини айтганди. 

Мелбурн Қироллик шифохонаси томонидан 2023 йил декабрда эълон қилинган ҳисоботга кўра, 2022 йилда тез ёрдамга 250 га яқин самокат ҳайдовчилар турли жароҳатлар билан мурожаат қилган. Шифохона вакилларининг сўзларига кўра, электросамокатлар иштирокидаги авариялар оқибатида ҳатто ўлим ҳолатлари, бош мия жароҳатланиши каби кўнгилсиз ҳодисалар ҳам кузатилган.